نصیر آباد بلوچستان میں ریلوے ٹریک کو دھماکا خیز مواد سے اڑا دیا گیا

کوئٹہ ( نمائندہ خصوصی) بلوچستان کے ضلع نصیرآباد کے علاقے نوتال پولیس تھانے کی حدود میں قومی شاہراہ کے قریب ریلوے ٹریک کو نامعلوم افراد نے دھماکا خیز مواد سے نشانہ بنایا۔پولیس ذرائع کے مطابق دھماکے سے ٹریک کو جزوی نقصان پہنچا تاہم خوش قسمتی سے کسی قسم کا جانی یا مالی نقصان نہیں ہوا۔ واقعہ نوتال کے قریب پیش آیا جہاں شرپسندوں نے ریلوے ٹریک پر دھماکا خیز مواد نصب کیا تھا۔دھماکے کی زور دار آواز دور تک سنی گئی، جس کے فوری بعد پولیس اور سیکیورٹی فورسز کی بھاری نفری جائے وقوعہ پر پہنچ گئی۔ پولیس نے علاقے کی مکمل ناکہ بندی کر دی اور سرچ آپریشن شروع کر دیا تاکہ ملزموں کا سراغ لگایا جا سکے۔پولیس حکام کا کہنا ہے کہ دھماکے سے ٹریک کا کچھ حصہ متاثر ہوا، جس کی وجہ سے ٹرینوں کی آمدورفت عارضی طور پر معطل رہی۔ ریلوے حکام نے فوری طور پر مرمت کا کام شروع کر دیا اور متاثرہ حصے کی بحالی جاری ہے۔ذرائع کے مطابق دھماکا اس وقت ہوا جب کوئی ٹرین گزرنے والی نہیں تھی، جس کی بدولت بڑا حادثہ ٹل گیا۔بلوچستان میں ریلوے انفرا اسٹرکچر کو نشانہ بنانے کے واقعات میں حالیہ دنوں اضافہ دیکھا گیا ہے۔ ماہرین کے مطابق یہ شرپسند عناصر کی جانب سے صوبے میں عدم استحکام پیدا کرنے کی کوشش ہے۔ سیکیورٹی اداروں نے علاقے میں مزید چوکنا رہنے کے احکامات جاری کر دیے ہیں۔