چیف سیکریٹری سندھ آصف حیدر شاہ سے حیدرآباد یونین آف جرنلسٹس کے وفد کی ملاقات

کراچی( نمائندہ خصوصی)چیف سیکریٹری سندھ آصف حیدر شاہ سے حیدرآباد یونین آف جرنلسٹس کے وفد نے ملاقات کی۔ وفد میں پاکستان فیڈرل یونین آف جرنلسٹس کے نائب صدر اور حیدرآباد پریس کلب کے صدر جنید خانزادہ، حیدرآباد یونین آف جرنلسٹس کے صدر حامد شیخ اور محمد حسین خان شامل تھے۔ ملاقات میں صحافی برادری کو درپیش مسائل، فلاحی اقدامات اور حیدرآباد کی مجموعی ترقی سے متعلق امور پر تفصیلی تبادلۂ خیال کیا گیا۔وفد نے چیف سیکریٹری سندھ کو حیدرآباد یونین آف جرنلسٹس کی جانب سے صحافیوں کے لیے ہیلتھ انشورنس اسکیم اور صحافیوں کی فلاح و بہبود کے لیے کیے گئے دیگر اقدامات سے آگاہ کیا۔ اس موقع پر وفد نے حیدرآباد پریس کلب کی جرنلسٹس کالونی سے متعلق مسائل، ترقیاتی ضروریات اور مستقبل کے منصوبوں پر بھی گفتگو کی۔ چیف سیکریٹری سندھ آصف حیدر شاہ نے شہری مسائل کی نشاندہی اور عوامی مسائل کو اجاگر کرنے میں حیدرآباد کے صحافیوں کے کردار کو قابلِ تحسین قرار دیا۔ انہوں نے کہا کہ سندھ حکومت صحافی برادری کے مسائل سے بخوبی آگاہ ہے اور ان کے مسائل کو ترجیحی بنیادوں پر حل کرنے کے لیے سنجیدہ کوششیں کی جا رہی ہیں۔چیف سیکریٹری سندھ نے وفد کو یقین دہانی کروائی کہ صحافیوں اور حیدرآباد پریس کلب کی کالونی سے متعلق ترقیاتی نوعیت کے مسائل کے حل کے لیے متعلقہ محکموں سے رابطہ کیا جائے گا اور ممکنہ اقدامات کیے جائیں گے۔ انہوں نے کہا کہ حیدرآباد کی تعمیر و ترقی کے لیے مزید منصوبے زیر غور ہیں جبکہ شہر میں مختلف ترقیاتی کام جاری ہیں۔ ملاقات کے اختتام پر وفد نے سندھ حکومت کی جانب سے صحافی برادری کے تحفظ اور فلاح و بہبود کے لیے کیے جانے والے اقدامات کو سراہتے ہوئے کہا کہ سندھ حکومت اس ضمن میں اپنا اہم اور مؤثر کردار ادا کر رہی ہے