پیرس ,( نمائندہ خصوصی)پاکستان کی معروف لوک اور صوفی گلوکارہ صنم ماروی نے پیرس کے تھیاتر دے لا ویل تھیٹر میں اپنی پرفارمنس کے ذریعے حاضرین کو مسحور کر دیا۔یہ کنسرٹ پیرس میں پاکستان کے سفارتخانہ اور دے لا ویل تھیٹر کے اشتراک سے منعقد ہوا جس میں فرانسیسی اور بین الاقوامی ناظرین کی بڑی تعداد نے شرکت کی۔اتوار کو پاکستان کے فرانس میں سفارتخانے سے جاری بیان کے مطابق پاکستان کی فرانس میں سفیر ممتاز زہرہ بلوچ نےصنم ماروی اور ان کی ٹیم کی شاندار کارکردگی کو سراہتے ہوئے کہا کہ پاکستانی موسیقی نے ایک بار پھر پیرس میں اپنی پہچان قائم کی ہے ۔ انہوں نے کہا کہ آج کے دور میں ثقافتی سفارت کاری اقوام اور معاشروں کو قریب لانے کا بہترین ذریعہ ہے۔
انہوں نے صنم ماروی کے فروخت شدہ کنسرٹ کی کامیابی کو پاکستان کے ثقافتی تشخص کے فروغ کے لیے ایک خوش آئند پیش رفت قرار دیا ۔ اس موقع پر صنم ماروی نے کہا کہ موسیقی زندگی کا ذائقہ ہے اور ہمیں اپنی روایتی موسیقی سے بے پناہ محبت ہے۔ انہوں نے کہا کہ پیرس کے بین الاقوامی سامعین کی پذیرائی ان کے لیے ایک ناقابلِ فراموش تجربہ ہے۔تھیاتر دے لا ویل کی انتظامیہ نے اس موقع پر کہا کہ صنم ماروی جیسے فنکاروں کی پیشکش فرانسیسی شائقین کو عالمی موسیقی سے لطف اندوز ہونے کا موقع فراہم کرتی ہے۔ انہوں نے کہا کہ موسیقی کی کوئی سرحد نہیں ہوتی اور اس پروگرام کا مقصد بین الاقوامی فنکاروں اور ان کے ممالک کو فرانسیسی عوام سے متعارف کرانا ہے۔
