این ڈی ایم اے کا مون سون کے 9ویں سپیل کے باعث ممکنہ بارشوں اور دریاؤں میں سیلابی صورتحال کے پیش نظر ہنگامی الرٹ جاری

اسلام آباد(نمائندہ خصوصی ):نیشنل ڈیزاسٹر مینجمنٹ اتھارٹی (این ڈی ایم اے) کے نیشنل ایمرجنسی آپریشن سینٹر نے مون سون کے نویں سپیل کے باعث ممکنہ بارشوں اور دریاؤں میں سیلابی صورتحال کے پیش نظر ہنگامی الرٹ جاری کر دیا۔ ترجمان این ڈی ایم اے کے مطابق سندھ کے جنوبی اضلاع بشمول ٹھٹھہ، سجاول، بدین، مٹھی، تھرپارکر، عمرکوٹ، سانگھڑ، کراچی، حیدرآباد اور جامشورو میں بارشوں کا امکان ہے۔ اسی طرح شمالی اضلاع سکھر، گھوٹکی، لاڑکانہ، خیرپور، دادو اور جیکب آباد میں ہلکی سے درمیانی بارشیں متوقع ہیں۔دریاؤں میں سیلابی صورتحال تشویشناک ہے۔ دریائے چناب میں قادرآباد کے مقام پر 5 لاکھ 7 ہزار اور چنیوٹ میں 5 لاکھ 24 ہزار کیوسک کا بہاؤ ریکارڈ کیا گیا ہے۔ خانکی پر 2 لاکھ 59 ہزار کیوسک کے ساتھ اونچا بہاؤ ہے جبکہ مرالہ اور تریموں میں درمیانے سے اونچے درجے کا بہاؤ برقرار ہے۔ ریواز پل پر پانی کی سطح 520.3 فٹ ہے، اور ہیڈ محمد والا اور شیر شاہ پر بہاؤ میں اضافہ ہو رہا ہے۔ دریائے چناب کے ملحقہ نالوں ایک اور پلکھو میں غیر معمولی بہاؤ کے باعث قریبی دیہات میں سیلاب کا خدشہ ہے۔دریائے راوی اور ستلج کی صورتحال بھی سنگین ہے۔دریائے راوی میں شاہدرہ پر 1 لاکھ اور بلوکی پر 1 لاکھ 34 ہزار کیوسک بہاؤ ہے جبکہ ہیڈ سدھنائی پر ایک لاکھ 35 ہزار کیوسک کے ساتھ شدید اونچا بہاؤ اور جسر پر درمیانی سے اونچی سیلابی صورتحال ہے۔ دریائے ستلج میں گنڈا سنگھ والا پر 3 لاکھ 27 ہزار کیوسک کے ساتھ اونچے درجے کا سیلاب ہے اور سلیمانکی و اسلام ہیڈ ورکس پر بھی اونچی سیلابی صورتحال برقرار ہے۔ بھارتی ڈیموں سے پانی کے مسلسل اخراج اور بارشوں کے باعث مشرقی دریاؤں میں سیلابی ریلے جاری ہیں۔ وزیراعظم کی ہدایت پر این ڈی ایم اے تمام ریسکیو و ریلیف سرگرمیوں کی نگرانی کر رہا ہے اور نیشنل ایمرجنسی آپریشن سینٹر 24 گھنٹے فعال ہے۔ این ڈی ایم اے نے شہریوں سے اپیل کی ہے کہ وہ دریاؤں کے کناروں سے محفوظ مقامات پر منتقل ہوں، مقامی انتظامیہ کی ہدایات پر عمل کریں، غیر ضروری سفر سے گریز کریں، اور ہنگامی کٹ تیار رکھیں۔ شہری اہم دستاویزات محفوظ کریں اور مزید رہنمائی کے لیے این ڈی ایم اے ڈیزاسٹر الرٹ ایپ استعمال کریں۔