اسلام آباد۔(نمائندہ خصوصی )وزیرِاعظم شہباز شریف کی ہدایت پر پاکستان کی جانب سے این ڈی ایم اے نے افغانستان کے زلزلہ متاثرین کے لئے 105 ٹن امدادی سامان روانہ کردیا۔این ڈی ایم اے کے میڈیا ونگ سے جاری بیان کے مطابق افغانستان میں 31اگست 2025کی رات آنے والے ہولناک زلزلے کے نتیجے میں 1400 افراد جاں بحق ہوئے۔این ڈی ایم اے کی جانب سے افغانستان کے زلزلہ 
متاثرین کے لئے 105 ٹن امدادی سامان روانہ کیا گیا۔امدادی سامان میں راشن بیگز،خیمے،کمبل، چٹائیاں اور ادویات شامل ہیں۔امدادی سامان40 فٹ کنٹینر والے 5 ٹرکوں کے ذریعے طور خم بارڈر کے راستے افغانستان پہنچایا گیا۔سامان 3 ستمبر کو اسلام آباد میں این ڈی ایم اے کے وئیر ہاؤس سے روانہ ہواجبکہ 4ستمبر کو طور خم بارڈر پر افغان حکام کے حوالے کیا گیا۔سامان حوالگی
تقریب میں مہمان خصوصی وفاقی وزیر امیر مقام ،پاکستان کے قونصل جنرل پاکستان جلال آباد قونصلیٹ شفقت اللہ اور افغانستان کے کونسل جنرل پشاور قونصلیٹ حافظ محب اللہ شاکر بھی اس موقع پر موجود تھے۔این ڈی ایم اے کے افسران سمیت افغان حکومت کے نمائندگان اور پاکستان میں افغانستان کے سفارتخانہ کے عہدیداران بھی موجود تھے۔ افغان ایمبیسی نے بروقت امدادی سامان کی ترسیل پر شکریہ ادا کیا۔
