وزیر اعظم شہباز شریف کی چینی صدر شی جن پنگ سے ملاقات ، پاک چین تزویراتی شراکت داری کو مزید مضبوط بنانے کے لیے دوطرفہ تعاون بڑھانے پر اتفاق

بیجنگ ۔(نمائندہ خصوصی ):پاکستان اور چین نے تزویراتی شراکت داری کو مزید مضبوط بنانے کے لیے اپنے مشترکہ عزم کا اعادہ کرتے ہوئے دوطرفہ تعاون کو مزید بڑھانے پر اتفاق کیا ہے ، وزیراعظم محمد شہباز شریف نے کہا ہے کہ پاکستان ترقی کے عظیم سفر میں چین کے ساتھ مل کر کام کرنے کےلئے تیار ہے جبکہ صدر شی جن پنگ نے کہا ہے کہ سی پیک اپنے دوسرے مرحلے میں داخل ہو چکا ہے، چین اقتصادی ترقی کے تمام شعبوں میں پاکستان کی مدد جاری رکھے گا۔ منگل کو وزیراعظم آفس کے میڈیا ونگ کی طرف سے جاری بیان کے مطابق وزیر اعظم محمد شہباز شریف نے بیجنگ کے عظیم عوامی ہال میں عوامی جمہوریہ چین کے صدر شی جن پنگ سے ملاقات کی۔بیان کے مطابق انتہائی خوشگوار ماحول میں ہونے والی ملاقات میں دونوں رہنماؤں نے پاکستان اور چین کے مابین اپنی مضبوط اور وقت کی ہر آزمائش پر پورا اترنے والی ، تزویراتی تعاون پر مبنی شراکت داری کو مزید مستحکم بنانے کے لیے اپنے مشترکہ عزم کا اعادہ کیا۔ وزیر اعظم نے تیانجن میں شنگھائی تعاون تنظیم کے سربراہان مملکت کے اجلاس کے کامیاب انعقاد پر صدر شی جن پنگ کو مبارکباد دی اور فسطائیت کے خلاف جنگ میں عظیم فتح کی 80ویں سالگرہ کے موقع پر انہیں مبارکباد دی۔ صدر شی جن پنگ کی دور اندیش قیادت ، جس کی بدولت چین نے جدیدیت اور ترقی کی منازل طے کیں ، کو سراہتے ہوئے وزیراعظم نے کہا کہ پاکستان کو چین کی کامیابیوں پر بے حد فخر ہے اور وہ اس عظیم سفر میں چین کے ساتھ مل کر کام کرنے کے لیے ہمیشہ تیار ہے۔وزیراعظم نے پاکستان کی علاقائی سالمیت، خود مختاری اور سماجی و اقتصادی ترقی کے لیے چین کی غیر متزلزل حمایت کو سراہا۔ انہوں نے صدر شی جن پنگ کے بیلٹ اینڈ روڈ انیشی ایٹو (بی آر آئی) کے ایک اہم منصوبے کے طور پر چین -پاکستان اقتصادی راہداری (سی پیک) کی اہمیت کو سراہا اور سی-پیک کے اگلے مرحلے، جس میں پانچ مزید راہداریوں کا اضافہ کیا گیا ہے، کے کامیاب نفاذ کے لیے چین کے ساتھ مل کر کام جاری رکھنے کی خواہش کا اعادہ کیا۔ ان اقدامات سےدونوں ممالک کو ایک مشترکہ مستقبل کےلئے پاکستان چین کمیونٹی کو مضبوط بنانے میں مدد ملے گی وزیر اعظم نے کثیرالجہتی نظام کو مضبوط بنانے کے لیے صدر شی جن پنگ کے پختہ عزم کو سراہتے ہوئے کہا کہ پاکستان صدر شی جن پنگ کے تاریخی اقدامات ، جس میں گلوبل گورننس انیشی ایٹو ، گلوبل ڈویلپمنٹ انیشی ایٹو ، گلوبل سیکیورٹی انیشی ایٹو اور گلوبل سولائزیشن انیشی ایٹو شامل ہیں، کی مکمل حمایت کرتا ہے۔ وزیراعظم نے کہا کہ یہ اقدامات اجتماعی عالمی بھلائی کے لیے ضروری اور علاقائی اور عالمی امن، استحکام اور ترقی میں معاون ثابت ہوں گے۔ صدر شی جن پنگ نے کہا کہ چین اقتصادی ترقی کے تمام شعبوں میں پاکستان کی مدد جاری رکھے گا، بالخصوص ایسے میں جبکہ سی پیک اپنے دوسرے مرحلے میں داخل ہو چکا ہے اور اس کے تحت پاکستان کے اہم ترین اقتصادی شعبوں پر توجہ مرکوز کی جا رہی ہے۔دونوں رہنماؤں نے پاکستان اور چین کے مابین منفرد اور بے مثال تعلقات پر اطمینان کا اظہار کرتے ہوئے اتفاق کیا کہ اس کی عکاسی دوطرفہ تعاون کو مزید بڑھانے کے ذریعے ہونی چاہیے۔دونوں رہنماؤں نے اہم علاقائی اور عالمی پیش رفت پر تبادلہ خیال کرتے ہوئے پاکستان اور چین کے مابین قریبی تعاون جاری رکھنے پر بھی اتفاق کیا۔ وزیراعظم نے صدر شی جن پنگ کو آئندہ سال پاک-چین دوستی کی 75ویں سالگرہ کے موقع پر پاکستان کا سرکاری دورہ کرنے کے لیے اپنی انتہائی پرخلوص دعوت کی بھی تجدید کی۔