پولیو کے مرض کے خاتمے کے لیے تمام وسائل بروئے کار لائے جائیں۔لاڑکانہ ڈویژن کے کمشنر غلام مصطفیٰ پھل

لاڑکانہ(بیورورپورٹ) لاڑکانہ ڈویژن کے کمشنر غلام مصطفیٰ پھل نے کہا ہے کہ پولیو کے مرض کے خاتمے کے لیے تمام وسائل بروئے کار لائے جائیں اور ریونیو اور محکمہ بلدیہ کے ملازمین کو پولیو مہم میں شامل کر کے اسے کامیاب بنایا جائے، ان خیالات کا اظہار انہوں نے اپنے دفتر میں ڈویژنل پولیو ایریڈیکیشن کمیٹی کے اجلاس کی صدارت کرتے ہوئے کیا،۔ اجلاس میں گزشتہ پولیو مہم پر غور کرکے آئندہ کی حکمت عملی طے کی گئی، کمشنر لاڑکانہ نے کہا کہ مہم میں ریونیو اور لوکل گورنمنٹ کے ملازمین کو شامل کرنے سے پولیو ٹیموں کو کافی مدد ملے گی کیونکہ وہ مقامی سطح پر مہم کی نگرانی کرسکتی ہیں، انہوں نے ڈویژن کے تمام ڈی سیز کو ہدایت کی کہ وہ مختیار کاروں، اسسٹنٹ مختیار کاروں، تپیداروں اور کوٹواروں کو پولیو ٹیموں کے ساتھ مکمل تعاون کرنے کی ہدایت کریں۔ یس سی ایم اوز پولیو ٹیم کو ڈیٹا فراہم کرنے کے ذمہ دار ہوں گے، انہوں نے کہا کہ ٹیموں کو سیکیورٹی فراہم کرنے کے لیے ڈی آئی جی لاڑکانہ سے بات کرکے انہیں مکمل سیکیورٹی فراہم کی جائے گی، اس کے علاوہ ڈی سیز اپنے متعلقہ اضلاع کے ایس ایس پیز سے بھی بات کریں، انہوں نے کہا کہ دیہات میں جانے والی ٹیموں کی نگرانی ضروری ہے، انہوں نے کہا کہ جہاں جہاں پولیو کیسز سامنے آئے ہیں ان علاقوں کی نگرانی مزید سخت کی جائے، کمشنر لاڑکانہ نے مزید کہا کہ لاڑکانہ ڈویژن میں اب بھی کچھ دیہات ایسے ہیں جہاں کے لوگ بچوں کو پولیو کے قطرے پلانے سے انکار کررہے ہیں، ان دیہات کے اچھے آدمیوں کے ذریعے انہیں مطمئن کرنے کی کوشش کی جائے، انہوں نے کہا کہ پولیو کے قطرے پلانے سے انکار کی کوئی گنجائش نہیں کمشنر لاڑکانہ نے ہدایت کی کہ پولیو ویکسین کو خراب ہونے سے بچانے کے لیے ضلعی سطح پر کولڈ چین کو یقینی بنایا جائے اس سلسلے میں ڈی سیز اور ڈی ایچ اوز مشترکہ طور پر کولڈ چین بنانے کے لیے جگہ تجویز کریں اور پلان بنائیں، اجلاس میں ڈی سی لاڑکانہ شرجیل نور چنا، ڈی سی قمبر شہدادکوٹ، ڈی سی کشمور کندھ کوٹ، ڈی سی جیکب آباد، پانچوں اضلاع کے ڈی ایچ اوز، پی پی ایچ آئی، اے پی آئی اور دیگر متعلقہ محکموں کے افسران نے بھی شرکت کی۔