کراچی(نمائندہ خصوصی ):وفاقی وزیر بحری امور قیصر احمد شیخ کی زیر صدارت اجلاس ہوا۔جس میں مختلف مسائل کو حل کرنے کے لیے کلیدی اسٹیک ہولڈرز شریک ہوئے۔ اس اجلاس میں کراچی ڈاک لیبر بورڈ (کے ڈی ایل بی) سے متعلق مختلف مسائل پر بات چیت کی گئی۔شرکاء میں آغا رفیع اللہ ایم این اے، آصف خان ایم پی اے، سید سیدین رضا زیدی، چیئرمین کے پی ٹی؛ کے
ڈی ایل بی کے نمائندگان احمد سعید، حسین پرائل، حسین بادشاہ، بشیر میمن (پی ایم ایل سندھ، صدر)، اور کے پی ٹی کے جنرل مینیجر شامل تھے ۔وفاقی وزیر قیصر شیخ کی زیر صدارت اجلاس میں کئی اہم مسائل پر بات چیت ہوئی اور انہیں کامیابی سے حل کیا گیا، جس سے کے ڈی ایل بی اور کے پی ٹی کے درمیان ہموار رابطہ اور تعاون یقینی بنایا گیا۔وفاقی وزیر سے کامیاب بات چیت کے بعد جاری احتجاج پر امن طریقے سے ختم کر دیا گیاجو تمام متعلقہ اسٹیک ہولڈرز کے مسائل کو حل کرنے کی طرف ایک مثبت قدم ثابت ہوا۔
