وزیراعلی پنجاب مریم نوازنے زرعی ٹیوب ویل سولرائزیشن پراجیکٹ کی منظوری دے دی

لاہور۔(نمائندہ خصوصی ):وزیراعلی پنجاب مریم نواز نے زرعی ٹیوب ویل سولررائزیشن پراجیکٹ کی منظوری دے دی۔انہوں نے یہ منظوری جمعہ کو اپنی زیر صدارت ہونے والے اہم اجلاس میں دی جس میں سینیٹر پرویز رشید، سینئر صوبائی وزیر مریم اورنگزیب،صوبائی وزیر اطلاعات و ثقافت عظمی زاہد بخاری، صوبائی وزیر زراعت سید عاشق حسین کرمانی، چیف سیکرٹری،سیکرٹری زراعت و دیگر حکام موجود تھے۔وزیر اعلی پنجاب نے اس موقع پر ویجیٹیبل فارمرزکیلئے بھی خصوصی پیکیج تیار کرنے کی ہدایت کی اورٹماٹر، پیازسمیت دیگر ضروری سبزیوں کی سپلائی کے لئے مینجمنٹ کا پائیدار سسٹم وضع کرنے کاحکم دیا ۔ اجلاس میں زرعی ٹیوب ویل کی سولرائزیشن پر بریفنگ میں بتایا گیا کہ 25 ایکڑ اراضی کے مالک کاشتکار زرعی ٹیوب ویل سولرائزیشن پراجیکٹ کے اہل ہوں گے ، سولرائزیشن پراجیکٹ کے لئے کاشتکار کو صرف 33فیصدادائیگی کرنا ہو گی،زرعی ٹیوب ویل سولرائزیشن پراجیکٹ کی67فیصد ادائیگی حکومت کرے گی،پہلے مرحلے میں 7ہزار ٹیوب ویل سولر انرجی پر منتقل کئے جائیں گےوفاقی حکومت کے اشتراک سے دوسرے مرحلے میں مزید 10ہزار ٹیوب ویل سولر انرجی پر منتقل ہوں گے،ڈیزل سے ٹیوب ویل چلانے پر فی ایکڑ اخراجات 3ہزار، بجلی سے 1500روپے خرچ ہوتے ہیں، سولر انرجی سے ایک ایکڑ کی آبپاشی پر صرف 50روپے خرچ ہوں گے۔وزیر اعلی مریم نواز شریف نے کہا کہ پنجاب حکومت کسانوں کو بجلی کے بھاری بلوں اور ڈیزل کے اخراجات سے نجات دلانے کے لئے پر عزم ہے ، کسانوں کا مہنگی بجلی کا مسئلہ حل کریں گے اور انہیں سولر پینل دیں گے۔انہوں نے کہا کہ ڈیزل اورمہنگی بجلی سے چھٹکارا ملنے پر فصل کی لاگت میں کمی آئے گی،کسان خوشحال ہوگا تو پنجاب خوشحال ہوگا۔