معاشرے کی بہتری اور سدھار کے لیے شاعروں اور ادیبوں کا کرادار بنیادی نوعیت کا ہے شعیب احمد

کراچی(اسٹاف رپورٹر) کراچی پریس کلب کے سیکرٹری شعیب احمد نے کہا ہے کہ معاشرے کی بہتری اور سدھار کے لیے شاعروں اور ادیبوں کا کرادار بنیادی نوعیت کا ہے، جس معاشرے میں ادیب اور شاعر اپنے ضمیر کی آزادی کے ساتھ لکھتے ہیں، وہ سماج قومی ترقی میں بہت آگے نکل جاتا ہے۔ پاکستان مختلف زبانوں اور قومیتوں کا ایک خوب صورت گلدستہ ہے جو انشااللہ رہتی دنیا تک قائم رہے گا اور اپنی خوشبوئیں بکھیرتا رہے گا۔ہفتہ کونامور سرائیکی شعراء جہانگیر مخلص اور شاہد عالم شاہد نے کراچی پریس کلب میں سیکرٹری کراچی پریس کلب شعیب احمد ،جوائنٹ سیکریٹری محمد منصف،رکن گورننگ باڈی نور محمد کلہوڑو سے ملاقات کی ،اس موقع پرروزنامہ 92نیوز کے ایڈیٹر سعید خاور،پریس کلب کی پریس اینڈ پبلیکیشن کمیٹی کے سیکرٹری عبدالرحمن اور دیگر ارکان بھی موجود تھے، سیکریٹری شعیب احمدنے کہا کہ سرائیکی وسیب محبت کرنے والے لوگوں کا خطہ ہے اور اس زبان میں شاعری کرنے والے شعراپاکستان کے عوام کے دلوں میں دھڑکن کی طرح بستے ہیں، ایڈیٹر و ادیب سعید خاور نے کہا کہ کراچی پریس کلب جس طرح پاکستان کی مختلف زبانوں خاص طور پر سرائیکی زبان کے ادیبوں اور شاعروں کی پذیرائی کرتا ہے اس کی ملک کے کسی اورکلب میں مثال ملنا مشکل ہے۔انہوں نے کہا کہ کراچی پریس کلب علم وادب کے فروغ میں اہم کردار ادا کررہا ہے جس کا ثبوت آج کی یہ خصوصی ملاقات اور بھر پور عزت افزائی ہے جو بہاول پور سے آئے ہوئے نامور شعرا کو دی گئی ہے۔اس کاکریڈٹ موجودہ صدر سعید سربازی اور سیکرٹری شعیب احمد کو جاتا ہے۔ سرائیکی زبان کے معروف شعراء جہانگیر مخلص اور شاہد عالم شاہد نے پس ماندہ علاقوں کے نمائندہ شاعروں کی عزت افزائی پر سیکرٹری شعیب احمد اور دیگر عہدے داروں کا شکریہ ادا کیا۔اس موقع پر سیکرٹری کراچی پریس کلب شعیب احمد، جوائنٹ سیکرٹری محمد منصف اور دیگر ارکان نے مہمان شعرا کو اجرک کے تحفے پیش کیے اور کراچی پریس کلب کا دورہ کرنے پران کا شکریہ ادا کیا۔