اسلام آباد۔(نمائندہ خصوصی )چیئرمین سینیٹ سید یوسف رضا گیلانی نے ملک کے مختلف علاقوں میں آسمانی بجلی گرنے اور بارشوں کے باعث ہونے والے جانی اور مالی نقصان پر دکھ اور افسوس کا اظہار کیا ہے ۔ اتوار کو سینیٹ سیکرٹریٹ سے جاری بیان کے مطابق چیئرمین سینیٹ نے کہا کہ متاثرین کے غم میں برابر کے شریک ہیں ، زخمیوں کی جلد صحتیابی کے لئے دعاگو ہوں۔چیئرمین سینیٹ سید یوسف رضا گیلانی نے کہا کہ مقامی ادراے ریسکیو اور ریلیف آپریشن میں تیزی لائیں ، عوام ریلیف اداروں کے ساتھ تعاون کریں اور امدادی کاروائیوں میں ہاتھ بٹائیں ۔ چیئرمین سینیٹ نے کہا کہ قدرتی آفات ایک عالمی مسئلہ ہیں ، مشترکہ کوششوں سے ہی منفی اثرات کا کم کیا جا سکتا ہے ۔ انہوں نے کہا کہ پاکستان کو موسمیاتی تبدیلیوں جیسے چیلنج کا سامنا ہے ۔