شاہ نورانی جانے والا زائرین سے بھرا ٹرک کھائی میں جاگرا، 17 افراد جاں بحق.20 سے زائد زخمی ہوگئے

کراچی ،حب(نمائندہ خصوصی ،کرائم رپورٹر )حب میں درگاہ شاہ نورانی جانے والا زائرین سے بھرا ٹرک کھائی میں جاگرا جس کے نتیجے میں 17افراد جاں بحق ہوگئے۔پولیس کے مطابق ٹھٹہ سے درگاہ شاہ نورانی جانے والے زائرین سے بھرا ٹرک عیاں پیر کےقریب کھائی میں گرا۔ٹرک کھائی میں گرنے کے نتیجے میں  17افراد جاں بحق اور 20 سے زائد زخمی ہوگئے۔ پولیس نے بتایاکہ زائرین کا تعلق ٹھٹہ سے ہے اور ٹرک میں 30 سے زائد افراد سوار تھے۔واقعے کے بعد وزیراعلیٰ بلوچستان کی ہدایت پر 12 شدید زخمیوں کو سول اسپتال کراچی منتقل کردیا گیا۔ دیگر زخمی حب کے سول اسپتال میں زیر علاج ہیں۔ادھر  وفاقی وزیرداخلہ محسن نقوی نے بھی حادثے پر اظہار افسوس کرتے ہوئے لواحقین سے اظہار ہمدردی کیا اور زخمیوں کی جلد صحتیابی کیلئے دعا کی۔ اس سے قبل پولیس کا کہنا تھاکہ ایمبولینسیں حادثے کی جگہ روانہ کردی گئیں ہیں اور زخمیوں کو کراچی منتقل کیا جا رہا ہے۔