چیئرمین جوائنٹ چیفس آف اسٹاف کمیٹی کا 11 ویں برسی پر قومی ہیرو ایم ایم عالم کو خراج تحسین

اسلام آباد ( نیوز ڈیسک)چیئرمین جوائنٹ چیفس آف اسٹاف کمیٹی نے 1965 کی جنگ کے ہیرو ائیر کموڈور محمد محمود عالم المعروف ایم ایم عالم کی 11 ویں برسی پر انہیں خراج تحسین پیش کیا ہے۔ائیر کموڈورایم ایم عالم نے 1965 کی جنگ میں 7 ستمبر کو ایک منٹ سے بھی کم وقت میں بھارتی فضائیہ کے 5 جیٹ طیاروں کو مار گرایا تھا۔ائیر کموڈور ایم ایم عالم کا ایک منٹ میں 5 طیاروں کو مار گرانے کا ریکارڈ آج تک ناقابل تسخیر رہا ہے۔
ائیر کموڈور ایم ایم عالم نے جنگ کے دوران 11 دنوں میں 9 دشمن طیاروں کو تباہ اور 2 طیاروں کو نقصان پہنچایا تھا۔اس جنگی ہیرو کو 1965 کی جنگ میں شاندار کارکردگی پر ستارہ جرأت سے نوازا گیا تھا۔ایم ایم عالم طویل علالت کے بعد 18 مارچ 2013 کو کراچی میں وفات پا گئے تھے۔سروسز چیفس نے بھی ائیر کموڈور محمد محمود عالم کو خراج تحسین پیش کیا۔