لاہور(نمائندہ خصوصی) سابق وزیراعلی پنجاب چوہدری پرویز الہی کو عدالتی حکم کے باوجود پیش نہ کرنے پر عدالت نے آئی جی اسلام آباد کے ناقابل ضمانت وارنٹ گرفتاری جاری کردیے۔پرویز الہی کی بازیبی کے لئے لاہور ہائی کورٹ میں متفرق درخواست سابق وزیراعلی کے وکیل طاہر نصر اللہ وڑائچ نے دائر کی۔درخواست میں موقف اپنایا گیا کہ پرویز الہی کو جوڈیشل مجسٹریٹ نے گزشتہ روز رہا کرنے کا حکم دیا مگر عدالتی حکم کے باوجود انہیں رہا نہیں کیا اور وہ اس وقت اینٹی کرپشن کی تحویل میں ہیں۔درخواست گزار نے استدعا کی کہ لاہور ہائی کورٹ پرویز الہی کو عدالت پیش کرنے اور ان کی بازیابی کے بعد رہا کرنے کا حکم دے۔پرویز الہی کو عدالتی حکم کے باوجود پیش نہ کرنے پر عدالت نے آئی جی اسلام آباد کے ناقابل ضمانت وارنٹ گرفتاری جاری کردئے۔ عدالت نے قابل ضمانت وارنٹ گرفتاری پر عملدرآمد نہ کرانے پر متعلقہ ایس پی کو بھی توہین عدالت کا نوٹس جاری کردیا۔جسٹس مرزا وقاص روف نے ریمارکس دیئے کہ قابل ضمانت وارنٹ جاری ہونے کے باوجود آئی جی اسلام آباد عدالت پیش نہیں ہوئے۔واضح رہے کہ گزشتہ روز مالی بےضابطگیوں کیس میں رہائی کے بعد راولپنڈی پولیس نے پرویز الہی کو ایک اور کیس میں لاہور سے گرفتار کیا تھا۔
