سانحہ 9 مئی: 16ملزمان کو اشتہاری قرار دینے کی کارروائی شروع

لاہور (نمائندہ خصوصی) انسداد دہشت گردی عدالت لاہور نے نو مئی واقعات کے کیس میں تحریک انصاف کے رہنما میاں اسلم اقبال ،فرخ حبیب ، حماد اظہر ،زبیر نیازی سمیت 16 ملزمان کو اشتہاری قرار دینے کی کارروائی شروع کر دی ۔ انسداد دہشت گردی عدالت کی جج عبہر گل نے نو مئی کو راحت بیکری کے سامنے پولیس گاڑیاں جلانے اور شر انگیز تقاریر کے کیس کی سماعت کی ۔پولیس نے بتایا کہ ملزمان گرفتاری کے خوف سے دانستہ طور پر چھپ رہے ہیں، ملزمان کو اشتہاری قرار دینے کی کارروائی کا آغاز کیاجائے۔ عدالت نے میاں اسلم اقبال ،فرخ حبیب ، حماد اظہر ،زبیر نیازی سمیت 16 کو اشتہاری قرار دینے کی کارروائی شروع کر دی ۔ عدالت نے حامد رضا ، زبیر نیازی ، واثق قیوم ، غلام عباس سمیت سولہ ملزمان کے خلاف کارروائی کا آغاز کیا ۔