وزیر اعظم اور وزیر خارجہ کل گندھارا سمپوزیم کے افتتاحی اجلاس سے خطاب کرینگے

اسلام آباد (نمائندہ خصوصی )وزیراعظم محمد شہباز شریف اور وزیر خارجہ بلاول بھٹو زرداری 11 جولائی تا 13 جولائی کے دوران تین روزہ گندھارا سمپوزیم کے افتتاحی اجلاس سے خطاب کرینگے،گندھارا ٹورازم پر وزیر اعظم کی ٹاسک فورس کے چیئرمین ڈاکٹر رمیش کمار وانکوانی اور وزیر مذہبی امور اور بین المذاہب ہم آہنگی سینیٹر طلحہ محمود بھی مختلف سیشنز سے خطاب کرینگے۔ اس کے علاوہ مختلف غیر ملکی اور مقامی معززین بھی تین روزہ سپموزیم کے دوران اہم خطاب کرینگے۔ سمپوزیم میں شریک مقامی اور غیر ملکی وفود صدر عارف علوی سے بھی ملاقات کریں گے۔سمپوزیم کا اہتمام گندھارا ٹورازم پر وزیر اعظم کی ٹاسک فورس، وزارت مذہبی امور اور بین المذاہب ہم آہنگی، پاکستان ٹورازم ڈویلپمنٹ کارپوریشن (پی ٹی ڈی سی)، قومی ورثہ اور ثقافت ڈویڑن اور پنجاب اور خیبر پختونخوا کے محکمہ آثار قدیمہ نے مشترکہ طور پر کیا ہے۔کانفرنس کا مقصد پاکستان میں بدھ مت کے تاریخی اور ثقافتی ورثے کو فروغ دینا اور محفوظ کرنا ہے۔ثقافتی سفارت کاری کی طاقت کو بروئے کار لاتے ہوئے، کانفرنس کا مزید مقصد بین الاقوامی تعلقات کو مضبوط بنانا، باہمی افہام و تفہیم کو فروغ دینا اور ثقافتی تبادلے کو بڑھانا ہے۔سمپوزیم میں ملائیشیا، ویتنام، تھائی لینڈ، نیپال، جنوبی کوریا اور سری لنکا سے متعدد بدھ بھکشو شرکت کرینگے۔ سمپوزیم کے مختلف سیشنز میں مختلف غیر ملکی پینلسٹ شرکت کریں گے جن میں پروفیسر روتھ ینگ پروفیسر آف آرکیالوجی، یونیورسٹی آف لیسٹر،برطانیہ، کوریا کلچرل فاﺅنڈیشن کے رکن یی یون جنگ اور شیہانتھا پشپا کمارا دیر من شامل ہیں۔ سری لنکا کے بدھاسنا مذہبی اور ثقافتی امور کے پروفیسر ڑیانگ ڈیباو، اسکول آف انٹرنیشنل جرنلزم اینڈ کمیونیکیشن اسٹڈیز، چین کے پروفیسر ڈاکٹر ہردیا رتنا سابق وائس چانسلر، لومبینی بدھسٹ یونیورسٹی، نیپال، کم یو تائی دیر ملٹی کلچر میوزیم سیول ، جنوبی کوریا سمیت دیگر بین الاقوامی ماہرین بھی شامل ہیں۔