اسلام آباد ( کورٹ رپورٹر ) اسلام آباد ہائی کورٹ نے اسلام آباد میں (ن )لیگ اور پی پی پی کی یوسیز اور حلقہ بندیوں سے متعلق درخواست کی سماعت کے دوران سیکرٹری وزارتِ داخلہ اور الیکشن کمیشن کو نوٹس جاری کر دئیے۔ بدھ کو اسلام آباد ہائی کورٹ کے چیف جسٹس اطہر من اللّٰہ نے کیس کی سماعت کی۔دورانِ سماعت وکیل قاضی عادل نے دلائل دیتے ہوئے کہا کہ حکومت نے کہہ دیا ہے کہ 101 یونین کونسلز ہونی چاہئیں، الیکشن شیڈول آچکا، گزشتہ روز کاغذاتِ نامزدگی جمع کرانے کی آخری تاریخ ہے، الیکشن کمیشن کے مطابق 50، حکومتی نوٹیفکیشن کے مطابق 101 یوسیز ہیں، الیکشن کمیشن نے یکم جولائی کو بلدیاتی الیکشن کرانے کا شیڈول دیا ہے، 20 ہزار کی 1 یونین کونسل بنانے کا گزشتہ حکومت نے بھی کہا تھا۔
عدالت نے اپنے ریمارکس میں کہا کہ امید ہے الیکشن کمیشن وزارتِ داخلہ کے نوٹیفیکیشن کے تناظر میں درخواست دیکھے گا۔عدالت نے سیکرٹری وزارتِ داخلہ اور الیکشن کمیشن کو نوٹس جاری کر دئیے۔عدالت نے فریقین کو آئندہ پیر تک پیراوائز کمنٹس اور جواب جمع کرانے کا حکم دیتے ہوئے کہا کہ الیکشن کمیشن کاغذاتِ نامزدگی کی تاریخ میں توسیع کی بھی درخواست دیکھے گا۔عدالت نے جواب طلب کرتے ہوئے کیس کی مزید سماعت پیر تک ملتوی کر دی۔
