چئیرمین پاکستان پیپلز پارٹی بلاول بھٹو زرداری کے وژن کے مطابق کراچی کے انفراسٹرکچر کو بہتر بنانے کے حوالے سے ترقیاتی کام جاری ہیں۔

کراچی (اسٹاف رپورٹر) وزیر بلدیات سندھ سید ناصر حسین شاہ

اور وزیر اطلاعات ومحنت سندھ سعید غنی

نے کہا ہے کہ چئیرمین پاکستان پیپلز پارٹی بلاول بھٹو زرداری کے وژن کے مطابق کراچی کے انفراسٹرکچر کو بہتر بنانے کے حوالے سے ترقیاتی کام جاری ہیں۔ موجودہ نا اہل، بدعنوان وفاقی حکومت اور ان کی حلیف جماعتوں کی وجہ سے لوگ شدید مشکلات کا شکار ہیں، عمران خان کے دن گنے جاچکے ہیں بہت جلد سلیکٹیڈ وزیراعظم سے نجات مل جائے گی،وہ شدید گھبراہٹ کا شکار ہیں جس کی وجہ سے ان کے لب ولہجے سے آگ برس رہی ہے جسے قابل رحم حالت قرار دیا جاسکتا ہے۔ ان خیالات کا اظہار انہوں دونوں صوبائی وزراء نے ضلع شرقی میں بلدیہ شرقی کی جانب سے انجام دئیے جانے والے گلشن اقبال اور جمشید زون میں انجام دئیے جانے والے مختلف ترقیاتی کاموں کا معائنہ اور بعد ازاں میڈیا سے بات چیت کرتے ہوئے کیا۔ اس موقع پر وزیر اعلی سندھ کے معاون خصوصی اقبال ساند، ایڈمنسٹریٹر بلدیہ شرقی رحمت اللہ شیخ ودیگر بھی ان کے ہمراہ موجود تھے۔ صوبائی وزراء نے ضلع شرقی میں اعوان روڈ منظور کالونی میں ترقیاتی کاموں کے حوالے سے میڈیا نمائندگان سے بات چیت کرتے ہوئے کہا کہ چئیرمین پاکستان پیپلز پارٹی بلاول بھٹو زرداری کے وژن کے مطابق کراچی کے انفراسٹرکچر کو بہتر بنانے کے حوالے سے کام جاری ہیں، سڑکوں، اسٹریٹ لائٹس، چوراہوں، پانی سیوریج سمیت دیگر ترقیاتی کاموں کے ذریعے عوام کو ریلیف فراہم کیا جارہا ہے، ہیلتھ سیکٹر کو بھی مضبوط بنانے کیلئے ہر ممکن اقدامات کئے جارہے ہیں، انہوں نے کہا کہ شب برات اور رمضان المبارک میں عوام کو ریلیف فراہم کرنے کیلئے بلدیاتی امور سر انجام دینگے، صحافیوں کے سوال پر انہوں نے کہا کہ موجودہ نا اہل، بدعنوان وفاقی حکومت اور ان کے حلیف جماعتوں کی وجہ سے لوگ شدید مشکلات کا شکار ہیں۔ انہوں نے کہا کہ عوام اس وقت مہنگائ، بیروزگاری سمیت دیگر مشکلات سے دوچار ہیں، انہوں نے کہا کہ عمران خان کو اردو پر تنقید کرنے کے بجائے اپنی اردو درست کرنے کی ضرورت ہے، آج بھی 70 سال کی عمر میں عمران خان بہت سے اردو کے الفاظ کا استعمال درست نہیں کرتے۔ وزیر اطلاعات ومحنت سندھ سعید غنی نے ایڈمنسٹریٹر بلدیہ شرقی رحمت اللہ شیخ اور ان کی ٹیم کو ترقیاتی کاموں کی انجام دہی پر سراہنے کے ساتھ سوالات کے جوابات دیتے ہوئے کہا کہ عمران خان کے دن گنے جاچکے ہیں، بہت جلد سلیکٹیڈ وزیراعظم سے نجات مل جائے گی۔ انہوں نے کہا کہ عمران خان اس وقت شدید گھبراہٹ کا شکار ہے، جس کی وجہ سے ان کے لب ولہجے سے آگ برس رہی ہے جسے قابل رحم حالت قرار دیا جاسکتا ہے۔ انہوں نے کہا کہ عمران نیازی اپنی شکست تسلیم کرچکے ہیں، ایم کیوایم کے متعلق سوال پر انہوں نے کہا کہ پیپلز پارٹی اصولی سیاست پر یقین رکھتی ہے اصولی سیاست کرنے والوں کیلئے دروازے کھلے ہیں جائز بات پر ساتھ ہیں لیکن غلط بات پر کسی سے سمجھوتہ نہیں کرسکتے. اس موقع پر رکن صوبائ اسمبلی نوید انتھونی، پیپلز پارٹی کے رہنما فرحان غنی، سپریٹنڈنگ انجنئیر بی اینڈ آر سلمان میمن، ایگزیکٹیو انجنئیر ایم اینڈ ای امتیاز بھٹو، ایگزیکٹیو انجنئیر بی اینڈ آر اقبال ملاح، ڈائریکٹرز توقیر عباس، آغا سمیر، سہیل صادق، اسسٹنٹ ایگزیکٹیو انجنئیرز ندیم زیدی، محمد ہارون سمیت پیپلز پارٹی کے دیگر علاقائ رہنما بھی موجود تھے.