سعودی عرب میں تیل و گیس کے 14 نئے ذخائر دریافت

اسلام آباد۔(انٹرنیشنل ڈیسک):سعودی عرب کے وزیر توانائی شہزادہ عبدالعزیز بن سلمان نے کہا ہے کہ قومی آئل کمپنی ’آرامکو‘ کی ٹیموں نے مشرقی ریجن اور ربع الخالی کے صحرائی علاقے میں تیل اور قدرتی گیس کے مزید 14 ذخائر دریافت کئے ہیں۔ ایس پی اےکے مطابق وزیر توانائی نے خادم الحرمین الشریفین شاہ سلمان بن عبدالعزیز اور ولی عہد شہزادہ محمد بن سلمان کو اس کامیاب دریافت پر مبارک باد پیش کی ۔شہزادہ عبدالعزیز بن سلمان نے دریافت ہونے والے تیل کے کنوؤں کے حوالے سے مزید بتایا کہ مشرقی ریجن کے کنوئیں ’الجبو 1‘ سے 800 بیرل جبکہ صیاہد آئل فیلڈ سے 630 بیرل یومیہ تیل کی پیداوار متوقع ہے۔مذکورہ دریافتوں کے بعد عیفان آئل فیلڈ کے کنوئیں ’عیفان 2 ‘ سے یومیہ 2840 بیرل تیل اور 0.44 ملین کیوبک فٹ قدرتی گیس حاصل کی جارہی ہے۔الجبیلہ کے البری آئل فیلڈ کے کنوئیں سے 520 بیرل تیل دریافت ہوا جبکہ یہاں 0.2 ملین مکعب فٹ قدرتی گیس بھی موجود ہے۔وزیر توانائی شہزادہ عبدالعزیز بن سلمان کا مزید کہنا تھا کہ مذکورہ دریافت ہونے والے آئل و گیس کے ذخائر عالمی توانائی کے شعبے میں اس حوالے سے مملکت کی پوزیشن کو مزید مستحکم کرتے ہیں جس سے اقتصادی ترقی کے نئے دروازے کھلیں گے۔