سرینگر( نمائندہ خصوصی)
غیرقانونی طور پر بھارت کے زیرقبضہ جموں و کشمیر میں کل جماعتی حریت کانفرنس نے خودفریبی پر مبنی بھارتی فوج کے اعلی کمانڈر کے اس بیان کی شدید مذمت کی ہے جس میں انہوں نے کہاہے کہ علاقے کی خصوصی حیثیت کی منسوخی کے بعد صورتحال میں بہتری آئی ہے۔کشمیر میڈیا سروس کے مطابق کل جماعتی حریت کانفرنس کے ترجمان نے سرینگر میں جاری ایک بیان میں کہا کہ کشمیر 05 اگست 2019ء سے فوج اور پولیس کے محاصرے میں ہے اور بھارت حق خودارادیت کے حصول کے لیے کشمیریوں کی جدوجہد کو دبانے کے لیے تمام تر ہندوتوا ہتھکنڈوں کے ساتھ فوجی طاقت کا وحشیانہ استعمال کر رہا ہے۔ انہوں نے کہا کہ آر ایس ایس کی حمایت یافتہ فسطائی مودی حکومت نے ظلم و بربریت کے تمام ریکارڈ توڑ دیے ہیں اور مقبوضہ علاقے کی خصوصی حیثیت کی منسوخی کے بعد سے کشمیری عوام کے تمام بنیادی حقوق سلب کر رکھے ہیں۔ترجمان نے کہا کہ دفعہ 370 اور 35-A کا خاتمہ کشمیری عوام کے بنیادی حقوق پر براہ راست حملہ اور بین الاقوامی قانون کی کھلی خلاف ورزی ہے۔ انہوں نے مودی حکومت پر زور دیا کہ وہ بین الاقوامی سطح پر تسلیم شدہ متنازعہ علاقے میں اپنا فرقہ وارانہ ایجنڈا ترک کرے اور اقوام متحدہ کی متعلقہ قراردادوں کے مطابق تنازعہ کشمیر کے حل کے لیے عملی اقدامات کرے۔ انہوں نے واضح کیا کہ بھارت کے ناجائز قبضے سے آزادی کے لیے کشمیری شہداء کی قربانیوں کو رائیگاں نہیں جانے دیا جائے گا۔بھارتی فوج کے کمانڈر لیفٹیننٹ جنرل اوپیندر دویدی نے منگل کو دعویٰ کیا کہ دفعہ 370 کی منسوخی کے بعد کشمیر کی سکیورٹی صورتحال میں بہتری آئی ہے اور اس وقت امن اور ترقی کے لیے حالات سازگار ہیں۔ انہوں نے یہ دعویٰ بھی کیا کہ بھارتی فوج آزاد جموں و کشمیر پر قبضے کے لئے حکومتی احکامات پر عملدرآمد کے لیے تیار ہے۔حریت ترجمان نے کہا کہ بھارتی فوجی کمانڈر کا دعویٰ آزاد جموں و کشمیر اور پاکستان کے بارے میں بی جے پی حکومت کے مذموم عزائم کا ایک اور ثبوت ہے۔انہوں نے مقبوضہ علاقے میں بھارتی فوجیوں کے ہاتھوں کشمیری نوجوانوں کے جعلی مقابلوں میں ماورائے عدالت قتل کی بھی شدید مذمت کی۔
دریں اثناء کل جماعتی حریت کانفرنس کی اکائی جموں و کشمیر ڈیموکریٹک پولیٹیکل موومنٹ نے سرینگر میں جاری ایک بیان میں افسوس کا اظہار کیا کہ بھارت ناقابلِ تنسیخ حق ، حق خودارادیت کے حصول کے لئے کشمیریوں کی منصفانہ جدوجہد کو دبانے کے لیے ظالمانہ ہتھکنڈے استعمال کر رہا ہے۔ بیان میں کہا گیا ہے کہ بھارتی فوجیوں نے مقبوضہ علاقے میں قتل و غارت کا سلسلہ تیز کر دیا ہے۔ ڈیموکریٹک پولیٹیکل موومنٹ نے عالمی برادری سے اپیل کی کہ وہ کشمیری عوام کو بھارتی مظالم سے بچانے کے لیے اقوام متحدہ کی قراردادوں کے مطابق تنازعہ کشمیر کے حل میں اپنا کردار ادا کرے۔
