عبدالحمید لون کی آسیہ اندرابی کے خلاف بھارتی عدالت کے فیصلے کی مذمت

اسلام آباد( نمائندہ خصوصی):آل پارٹیز حریت کانفرنس (اے پی ایچ سی) کے سینئر رہنما عبدالحمید لون نے بھارتی عدالت کے حالیہ فیصلے کی شدید مذمت کرتے ہوئے اسے جانبدارانہ اور غیر منصفانہ قرار دیا ہے۔ اطلاعات کے مطابق، عدالت نے دخترانِ ملت کی سربراہ آسیہ اندرابی کو غیر قانونی سرگرمیوں کی روک تھام کے قانون (یو اے پی اے) کے تحت درج مقدمے میں قصوروار قرار دیتے ہوئے عمر قید کی سزا سنائی ہے جس کا ذکر یہاں جاری کردہ ایک بیان میں کیا گیا۔ لون نے کہا کہ آسیہ اندرابی کشمیر کاز اور حقِ خودارادیت کیلئے سیاسی طور پر سرگرم رہی ہیں۔انہوں نے مزید بھارتی عدلیہ پر تنقید کرتے ہوئے فیصلے میں غیر جانبداری کے فقدان کا الزام عائد کیا۔ اسی مقدمے میں اندرابی کی ساتھی ناہیدہ نسرین اور فہمیدہ صوفی کو بھی 30، 30 سال قید کی سزائیں سنائی گئی ہیں۔ لون نے بھارت کی جانب سے بین الاقوامی قوانین کو نظرانداز کرنے پر بھی تشویش کا اظہار کرتے ہوئے کہا کہ یہ فیصلہ نظامی جانبداری کی عکاسی کرتا ہے۔