نیویارک پولیس کے پاکستانی نژاد افسران نےپاکستانی ثقافت اور عزم کا دن منایا

نیویارک (نیوز ڈیسک)نیویارک پولیس ڈیپارٹمنٹ میں خدمات انجام دینے والے پاکستانی نژاد امریکی پولیس افسران نےپاکستانی ثقافت اور عزم کا دن منایا ، جس میں پاکستانی امریکن لا انفورسمنٹ سوسائٹی کی قابل فخر ثقافتی شناخت اور عوامی خدمت کو اجاگر کیا گیا۔ گزشتہ روز نیویارک پولیس ڈیپارٹمنٹ کے ہیڈکوارٹرز میں منعقدہ تقریب میں امریکا میں پاکستان کے سفیر رضوان سعید شیخ اور نیویارک میں پاکستان کے قونصل جنرل عامر احمد اتوزئی نے شرکت کی۔تقریب میں اعلیٰ پولیس افسران، بڑی تعداد میں پولیس اہلکار، پاکستانی نژاد امریکی افسران، ان کے اہلِ خانہ اور کمیونٹی کے نمایاں افراد نے بھی شرکت کی۔ اپنے خطاب میں پاکستانی سفیر نے نیویارک کی متنوع کمیونٹیز میں امن و امان برقرار رکھنے میں پاکستانی نژاد امریکی افسران کے کردار کو سراہا۔انہوں نے ان کی پیشہ ورانہ صلاحیت، لگن اور عوامی خدمت کے جذبے کی تعریف کی۔ انہوں نے پاکستان میں ان افسران کی فلاحی سرگرمیوں کو بھی خراجِ تحسین پیش کیا اور کہا کہ یہ اقدامات ان کے وطن سے مضبوط تعلق اور عالمی ذمہ داری کے احساس کو ظاہر کرتے ہیں۔ پاکستانی سفیر نے انہیں پاکستان کے حقیقی نمائندے قرار دیا جو اتحاد، حوصلے اور ثقافتی ورثے کی اقدار کی عکاسی کرتے ہیں۔ اس موقع پر پاکستان کے قونصل جنرل عامر احمد اَتوزئی نے بھی پاکستانی نژاد امریکی افسران کی خدمات کو سراہتے ہوئے کہا کہ وہ نیویارک میں قانون کی بالادستی اور کمیونٹی تعلقات کو مضبوط بنانے میں اہم کردار ادا کر رہے ہیں۔ انہوں نے پاکستان کی ثقافت کے فروغ اور امریکا و پاکستان دونوں میں فلاحی سرگرمیوں میں ان کی مسلسل شرکت کو قابلِ تعریف قرار دیا۔