اسرائیل نے جنوبی لبنان کے رہائشی علاقے میں ممنوعہ سفید فاسفورس کا استعمال کیا،ہیومن رائٹس واچ

لندن ( نمائندہ خصوصی):انسانی حقوق کے تحفظ کے لئے کام کرنے والے عالمی ادارے ہیومن رائٹس واچ (ایچ آر ڈبلیو) نے اپنی تازہ رپورٹ میں کہا ہے کہ اسرائیل نے رواں ماہ جنوبی لبنان کے رہائشی علاقوں میں سفید فاسفورس استعمال کیا، جو بین الاقوامی انسانی قانون کی خلاف ورزی ہے۔ بی بی سی کے مطابق ہیومن رائٹس واچ کی رپورٹ میں ایسی سات تصاویر کی تصدیق کی گئی ہے جن میں یُحمور کے رہائشی قصبے پر سفید فاسفورس گولہ باری اور کم از کم دو گھروں میں آگ لگنے کے واقعات دکھائے گئے ہیں۔ یہ واقعہ تین مارچ کو پیش آیا تھا ۔ہیومن رائٹس واچ کے محقق رمزی کیس نے کہا کہ رہائشی علاقوں پر اسرائیلی فوج کا سفید فاسفورس استعمال غیر قانونی اور نہایت تشویشناک ہے، جس کے شہریوں پر سنگین اثرات مرتب ہوں گے۔ انہوں نے مزید کہا کہ سفید فاسفورس کے جلانے والے اثرات موت یا ایسے شدید زخم پیدا کر سکتے ہیں جو عمر بھر کی تکلیف کا باعث بنتے ہیں۔ہیومن رائٹس واچ نے سات تصاویر کی تصدیق اور جغرافیائی محلِ وقوع کی نشاندہی کی ہے جن میں فضائی دھماکے کے ذریعے سفید فاسفورس دکھائی دیتا ہے، اور شہری دفاع کے کارکن گھروں اور ایک گاڑی میں لگی آگ بجھا رہے ہیں۔سفید فاسفورس آکسیجن کے سامنے آتے ہی جل اٹھتا ہے، اور گھروں، کھیتوں اور شہری تنصیبات کو آگ لگا سکتا ہے۔ بین الاقوامی قانون کے مطابق آبادی والے علاقوں میں فضائی دھماکے کے ذریعے سفید فاسفورس کا استعمال اندھا دھند اور غیر قانونی ہے۔ہیومن رائٹس واچ نے اس سے پہلے بھی 2023 اور 2024 میں جنوبی لبنان میں اسرائیلی فوج کے وسیع پیمانے پر سفید فاسفورس کے استعمال کو دستاویزی شکل دی تھی۔ہیومن رائٹس واچ کا کہنا کہ اسرائیل کو فوری طور پر اس عمل کو روکنا چاہیے اور اس کے اتحادی ممالک بشمول امریکا ، برطانیہ اور جرمنی کو اسرائیل کو فوجی امداد اور اسلحے کی فروخت معطل کرنی چاہیے۔