اسلام آباد۔,( نمائندہ خصوصی):صحت کے ماہرین نے انکشاف کیا ہے کہ روزانہ وٹامن ڈی کا استعمال کولیسٹرول کی سطح کو نمایاں طور پر کم کرنے، ہائی بلڈ پریشر اور ذیابیطس کے خطرے کو کم کرنے اور جسم میں انسولین کی پیداوار بہتر بنانے میں مدد دیتا ہے۔بین الاقوامی طبی جریدے میں شائع ہونے والی ایک تحقیق کے مطابق امریکہ اور چین کے محققین نے دنیا بھر کی 
99 مطالعات کا جائزہ لیا جس میں تقریباً 18 ہزار افراد شامل تھے۔تحقیق میں بتایا گیا کہ وٹامن ڈی کا باقاعدہ استعمال صحت کے متعدد فوائد فراہم کرتا ہے اور مختلف دائمی بیماریوں سے بچاؤ میں مددگار ثابت ہوسکتا ہے۔ماہرین نے کہا کہ اگرچہ وٹامن ڈی کا روزانہ استعمال ہر عمر کے افراد کے لیے مفید ہے تاہم یہ زیادہ عمر والے افراد کے لیے خاص طور پر مؤثر ہے کیونکہ بڑھتی عمر کے ساتھ جسم میں فطری وٹامن ڈی کی سطح کم ہوتی جاتی ہے۔انہوں نے کہا کہ 50 سال سے زائد عمر کے افراد باقاعدگی 
سے وٹامن ڈی لینے سے زیادہ فائدہ حاصل کرسکتے ہیں۔تحقیق میں تجویز کیا گیا کہ وٹامن ڈی کا صرف ایک کیپسول روزانہ لینا بھی کولیسٹرول، بلڈ پریشر اور ذیابیطس کو کنٹرول کرنے میں معاون ثابت ہوسکتا ہے۔تاہم ماہرین نے مشورہ دیا کہ وٹامن ڈی کے قدرتی ذرائع جیسے دھوپ سے استفادہ اور غذائیت سے بھرپور خوراک کو ترجیح دی جائے جبکہ صحت مند سطح برقرار رکھنے کے لیے سپلیمنٹس ضرورت پڑنے پر استعمال کیے جائیں۔
