ڈبہ پیک موبائل پرانا نکلا، شہری عدالت پہنچ گیا

کراچی : کسی بھی مشینری یا ٹیکنکل آلات کی خریداری میں دھوکہ دہی اکثر دیکھنے میں آتی ہے جس کا خمیازہ بعد میں خریدار کو ہی بگھتنا پڑتا ہے۔

اس حوالے سے کراچی کے ایک شہری کے ساتھ بھی کچھ ایسا ہی ہوا لیکن اس نے نقصان برداشت کرنے کے بجائے انصاف کے حصول کیلئے عدالت کا دروازہ کھٹکھٹا دیا۔

ہوا کچھ یوں کہ کراچی ایک شہری نے شہر کی مشہور موبائل مارکیٹ سے ایک ڈبہ پیک موبائل21 جولائی کو43ہزار روپے میں خریدا۔

شہری نے عدالت کو دی گئی درخواست میں بتایا کہ کچھ وقت استعمال کے بعد موبائل میں سگنلز کا مسئلہ آنے لگا، لیکن جب میں موبائل واپس کرانے گیا تو دکانداراسے واپس یا تبدیل کرنے سے انکارکردیا۔

درخواست گزار کے مطابق صارف موبائل سینٹر لے کر گیا توپتا چلا یہ موبائل پہلے سے استعمال شدہ ہے، عدالت موبائل دکاندار پر5 لاکھ50ہزار جرمانہ عائد کرے۔

درخواست میں عدالت سے استدعا کی گئی ہے کہ متعلقہ کمپنی اور دکاندار کے خلاف کارروائی کا حکم دیا جائے،شہری کی درخواست پر عدالت نے فریقین کو نوٹس جاری کردیا۔