اسرائیل مغرب کا بگڑا ہوا بچہ اور مشرق وسطیٰ میں بدامنی کا ذمہ دار ہے، طیب اردوان

ابو ظہبی(نیٹ نیوز) اقوام متحدہ کی موسمیاتی تبدیلی کانفرنس کوپ 28میں امریکا، چین اور ترکیہ نے غزہ کی صورت حال پر تشویش کا اظہار کرتے ہوئے تنازع کے فوری اور پر امن حل کی ضرورت پر زور دیا۔عالمی خبر رساں ادارے کے مطابق ترک صدر طیب اردوان نے غزہ میں ”بفر زون منصوبے“ کو مسترد کرتے ہوئے کہا کہ ہر صورت معصوم شہریوں کے جانی نقصان کو روکا جائے۔ جس کے لیے بہترین ذریعہ دو ریاستی حل ہے۔ترک صدر طیب اردوان نے غزہ میں حماس کے علاوہ کسی اور کی حکومت قائم کرنے کی خبروں پر کہا کہ فلسطین کے مستقبل سے متعلق کسی بھی غیر جمہوری انتظام کو فلسطینی عوام کی مرضی سے مشروط ہونا چاہیے۔ترک صدر طیب اردوان نے مشرق وسطیٰ میں خراب صورت حال کا ذمہ دار صیہونی ریاست کو قرار دیتے ہوئے کہا کہ اسرائیل “مغرب کا بگڑا ہوا بچہ” بن گیا ہے۔ متحدہ عرب امارات کی میزبانی میں منعقد کردہ اقوام متحدہ کی موسمیاتی تبدیلی کانفرنس (COP28) میں جہاں دنیا کو موسمیاتی تغیرات کی وجہ سے درپیش مسائل پر گفتگو ہوئی وہیں غزہ کی صورت حال پر بھی بات چیت کی گئی۔چین اور امریکا کے اعلیٰ سفارت کاروں نے غزہ کی صورت حال پر تشویش کا اظہار کیا جب کہ ترکی نے غزہ کے لیے “بفر زون منصوبے“ کو مسترد کرتے ہوئے بدامنی کو کم کرنے کی ضرورت پر اتفاق کیا۔ امریکی وزیر خارجہ انٹونی بلنکن نے فلسطین میں بدامنی کو پھیلنے سے روکنے کے لیے کام کرنے والے تمام فریقوں کے درمیان مربوط رابطے کی ضرورت کا اعادہ کیا اور مغربی کنارے میں فلسطینیوں پر تشدد پر اسرائیل پر تنقید کی۔