چیئرمین پی ٹی آئی زمان پارک سے گرفتار ، کوئی مزاحمت نہ کی

لاہور(نمائندہ خصوصی) توشہ خانہ کیس میں گرفتاری کے احکامات کے بعد پولیس نے چیئرمین پی ٹی آئی کو ان کی رہائشگاہ زمان پارک سے گرفتار کر لیا ،کسی بھی نا خوشگوار واقعہ اور مزاحمت سے نمٹنے کے لئے دھرم پورہ، جیل روڈ اور مال روڈ پر پولیس کی بھاری نفری کو تعینات کر دیا گیا جبکہ زمان پارک جانے والے راستے بھی بند کر دئیے گئے ۔ تفصیلات کے مطابق توشہ خانہ کیس میں عدالت کی جانب سے پی ٹی آئی چیئرمین کی گرفتاری کے فیصلے کے بعد اسلام آباد پولیس گرفتاری کےلئے زمان پارک پہنچی جہاں اسے پنجاب پولیس کی معاونت بھی حاصل رہی ۔پولیس افسران نے عمران خان کے سکیورٹی افسران کوبتایا کہ چیئرمین تحریک انصاف کے وارنٹ گرفتاری آ گئے ہیں جس پر انہیں گرفتار کرنا ہے۔بتایا گیا ہے کہ اس دوران پولیس کی ایک گاڑی گھر اندر گئی اور باقی کیڈ باہر ہی موجود رہا۔ذرائع کے مطابق پولیس افسران اور چیئرمین پی ٹی آئی کے درمیان کچھ دیر بات چیت ہوئی جس کے بعد چیئرمین پی ٹی آئی نے گرفتاری کے وقت کوئی مزاحمت نہیں کی، ان کو گھر کے اندر سے ہی گاڑی میں بٹھایا گیا ۔ نگران وزیر اطلاعات عامر میر کے مطابق اسلام آباد پولیس عمران خان کو گرفتاری کے بعد لاہور سے لے کر اسلام آباد روانہ ہو گئی ۔پی ٹی آئی چیئرمین کی گرفتاری کے موقع پر کسی نا خوشگوار واقعہ اور مزاحمت سے بچنے کے لئے پولیس کی بھاری نفری کو دھرم پورہ، جیل روڈ اور مال روڈ پر تعینات کیا گیا تھا جبکہ زمان پارک کی طرف آنے والے راستے بند رکھے گئے ۔عمران خان کی گرفتاری کے بعد تمام راستے کھول دئیے گئے ۔