آرمی ایکٹ کی منظوری میں ووٹ پر پی ٹی آئی اراکین کے خلاف کارروائی کا فیصلہ

اسلام آباد (نمائندہ خصوصی)پاکستان تحریک انصاف نے آرمی ایکٹ کی منظوری میں کردار ادا کرنے والے اپنی پارٹی کے ارکان کے خلاف کارروائی کا فیصلہ کرلیا، پارٹی نے شبلی فراز کو جائزہ کمیشن کا سربراہ بنا دیا۔ پارٹی ترجمان کے مطابق شبلی فراز کی تحقیقات کی روشنی میں پارٹی پالیسی سے انحراف کے مرتکب ارکان کے خلاف کارروائی کی جائے گی۔پاکستان تحریک انصاف کی کور کمیٹی کے اجلاس میں آرمی ایکٹ کی منظوری کے عمل میں پی ٹی آئی اراکین کے کردار کا جائزہ لیا گیا۔چیئرمین پی ٹی آئی نے اجلاس کی صدارت کی، اجلاس میں ملکی مجموعی سیاسی صورتحال پر تبادلہ خیال کیا گیا۔ترجمان پی ٹی آئی کے مطابق آرمی ایکٹ کی منظوری کے عمل میں پی ٹی آئی اراکین کے کردار سے متعلق سینیٹر شبلی فراز پر مشتمل کمیشن معاملے کی جامع تحقیقات کرے گا، پارٹی پالیسی سے انحراف کے مرتکب ارکان کے خلاف کارروائی کی جائے گی۔پی ٹی آئی اجلاس میں آئندہ انتخابات کی تیاریوں، سیاسی حکمت عملی پر بھی گفتگو کی گئی۔دوسری جانب پاکستان تحریک انصاف نے پی ٹی آئی پارلیمنٹرینز میں شامل ارکان کی بنیادی رکنیت ختم کر دی۔اعلامیہ کے مطابق سابق وزیراعلیٰ محمود خان، ضیاء اللّٰہ بنگش، اشتیاق ارمڑ سمیت 20 سے زائد ارکان کی رکنیت ختم کر دی گئی۔پی ٹی آئی کے مرکزی سیکریٹری جنرل عمر ایوب نے ارکان کو نوٹس جاری کر دئیے۔