اسلام آباد( نمائندہ خصوصی )پاکستان اور بھارت کے حکام نے 31 دسمبر 1988 کے معاہدے کے تحت اتوار کو باہمی جوہری تنصیبات اور سہولیات بارے فہرستوں کا تبادلہ کیا،یہ عمل اسلام آباد اور نئی دہلی میں انجام پایا۔ اتوار کو ترجمان دفتر خارجہ کی جانب سے جاری بیان میں کہا گیا کہ معاہدے کے مطابق پاکستان میں جوہری تنصیبات اور سہولیات کی فہرست باضابطہ طور پر وزارت خارجہ میں بھارتی ہائی کمیشن کے نمائندے کے حوالے کی گئی، ادھر،بھارتی وزارت خارجہ نے نئی دہلی میں پاکستانی ہائی کمیشن کے نمائندے کو اپنے ملک کی نیوکلیئر تنصیبات اور سہولیات کی فہرست فراہم کی۔انہوں نے بتایا کہ31 دسمبر 1988 کو طے پانے والے معاہدے میں طے کیا گیا تھا کہ دونوں ممالک ہر سال یکم جنوری کو ایک دوسرے کو اپنی جوہری تنصیبات اور سہولیات بارے آگاہ کریں گے، بعد ازاں 27 جنوری 1991 میں اس کی توثیق کی گئی تھی۔ وزارت خارجہ کا کہنا ہے کہ فہرستوں کے تبادلے کا سلسلہ یکم جنوری 1992 سے جاری ہے۔
