کراچی۔( بیورورپورٹ )
تحریک استقلال کے مرکزی صدر رحمت خان وردگ نے جنرل قمر جاوید باجوہ کو رائل ملٹری اکیڈمی برطانیہ سمیت دیگر 5 ممالک سے اعلی فوجی و سول اعزازات ملنے پر انہیں مبارکباد پیش کی اور کہا کہ جنرل باجوہ کی پیشہ ورانہ خدمات کے اعتراف میں انہیں ایوارڈز ملنے سے دنیا بھر میں پاکستان اور پاک فوج کا نام مزید روشن ہوا ہے۔ انہوں نے کہا کہ ہمارے سیاستدان ایسے نمایاں کام کیوں نہیں کرتے کہ انہیں بھی دیگر ممالک سے اعلی اعزازات ملیں؟ انہوں نے کہا کہ سیاستدان دن رات ایک دوسرے کی کردار کشی اور الزام تراشیوں سے ہی غارغ نہیں۔
انہوں نے مزید کہا کہ ہماری مسلح افواج ہمارے ملک کا قیمتی سرمایہ ہیں جنہوں نے ہمیشہ اپنی پیشہ ورانہ ذمہ داری خوش اسلوبی سے ادا کی اور ملک کو ہر مشکل وقت میں پاک فوج نے ہی آکر سنبھالا۔ کاش ہمارے سیاستدانوں میں اتنی اہلیت ہوتی کہ وہ عالمی طور پر ملک کے لئے فخر کا باعث بن سکتے۔ انہوں نے کہا کہ اس وقت سیاستدانوں نے اپنی نا اہلیوں سے ملک کو جہاں پہنچا دیا ہے وہاں اگر اب بھی ہوش کے ناخن نہ لئے اور ملک کو انتشار کا شکار کیا گیا تو مجبورا ملک کی سالمیت و دفاع کے ذمہ دار اداروں کو آگے آنا ہوگا جس کی تمام تر ذمہ داری نااہل سیاستدانوں پر عائد ہوگی۔
