اسلام آباد (بیورورپورٹ) وفاقی وزیر تجارت سید نوید قمر نے کہا ہے کہ ایران اور پاکستان کے تجارتی روابط سے خطہ میں خوشحالی آئے گی،ایران کے ساتھ روایتی تجارت کی راہ ہموار کرنے پر کام کررہے ہیں ، فری ٹریڈ ایگریمنٹ کے حوالے سے ٹیرف میں خاطر خواہ کمی کی جائے گی۔ جمعرات کو ایرانی وزیر روڈ اربن ڈویلپمنٹ روستم قہسامی کے ہمراہ مشترکہ پریس کانفرنس سے خطاب کرتے ہوئے وفاقی وزیر سید نوید قمر نے کہا کہ ایران کے ساتھ روایتی تجارت کی راہ ہموار کرنے پر کام کررہے ہیں ، فری ٹریڈ ایگریمنٹ کے حوالے سے ٹیرف میں خاطر خواہ کمی کی جائے گی، بارڈر پر گڈ زٹریڈ سے متعلق اکنامک زونز بنائے جائیں گے۔
انہوں نے کہا کہ ایرانی وفد سے بات چیت میں پاک ایران تجارت کو فروغ دینے میں پیش رفت کا جائزہ لیا ہے ، دونوں ممالک کے تجارتی روابط خطے میں خوشحالی لائیں گے۔ ایرانی وزیر روستم قہسامی نے کہا کہ پاکستان کی شاندار میزبانی پر مشکور ہیں۔ انہوں نے کہا کہ دونوں ممالک میں جے ای سی میں 6 سال وقفہ ہونے سے تجارتی دوریاں بڑھ گئیں، بارڈر مارکیٹ کے رجحان کو فروغ دینا ہوگا ، بارڈر مارکیٹ سے دونوں ممالک کی بزنس کمیونٹی کے رابط بھی بڑھیں گے۔ انہوں نے کہا کہ تجارتی اشیاءکی فہرست پر سنجیدگی سے کام کریں اور باہمی آمادگی سے معاملات آگے بڑھائیں گے۔ انہوں نے کہا کہ پاک ایران تجارتی تعلقات صرف نشست تک محدود نہیں ہوں گے ہم عملی اقدام کرنے کو ترجیح دیں گے۔
