صدر مملکت کی انڈونیشیا کے صدر، حکومت اور عوام کو ان کے یوم آزادی پر مبارکباد

اسلام آباد۔(نمائندہ خصوصی):صدر مملکت آصف علی زرداری نے انڈونیشیا کے صدر پرابوو سوبیانتو، حکومت اور عوام کو ان کے یوم آزادی پر مبارکباد کا پیغام دیا ہے۔ایوان صدر کے پریس ونگ سے جاری بیان کے مطابق انڈونیشیا کے یومِ آزادی پر​اپنے تہنیتی خط میں صدر مملکت آصف علی زرداری نے کہا کہ یہ تاریخی موقع انڈونیشیا کے عوام کے جذبے، استقامت اور عزم کے ساتھ ساتھ آزادی کی جدوجہد میں ان کی قوم کے بانی رہنماؤں کی قیادت کی یاد دلاتا ہے۔​صدر آصف علی زرداری نےکہا کہ پاکستان اور انڈونیشیا کے درمیان مشترکہ تاریخ، باہمی اعتماد، مشترکہ عقیدے اور دوطرفہ، علاقائی و بین الاقوامی سطح پر تعاون پر مبنی قریبی اور دوستانہ تعلقات قائم ہیں۔ انہوں نے کہا کہ دونوں ممالک نے تجارت، سرمایہ کاری، دفاع، صحت، تعلیم اور عوامی روابط سمیت متعدد شعبوں میں تعاون کو مسلسل وسعت دی ۔​صدر مملکت نے اس اعتماد کا اظہار کیا کہ گزشتہ سال صدر پرابوو سوبیانتو کے دورۂ پاکستان سے دونوں ممالک کے تعلقات کو نئی جہت ملی جس سے باہمی مفاد میں تعاون کو مزید گہرا کرنے میں مدد ملے گی۔ انہوں نے انڈونیشیا کے عوام کے امن، ترقی اور خوشحالی کے لیے نیک تمناؤں کا اظہار کیا