”اپنا مویشی…………اپنا ہی روزگار“ وزیراعلیٰ مریم نواز شریف کا دیہی خواتین کو معاشی طور پرخودمختار بنانے کے عزم کا اعادہ

لاہور( نمائندہ خصوصی)وزیراعلیٰ پنجاب مریم نواز شریف کے ویژن کے تحت دیہی خواتین کو معاشی خودمختار بنانے کے لئے مفت مویشی پروگرام کاآغاز کر دیا گیا ہے۔ وزیراعلیٰ مریم نواز شریف کی ہدایت پردیہی خواتین کو مفت مویشی کی فراہمی شروع کر دی گئی ہے۔ مفت مویشی پروگرام کے تحت پہلے مرحلے میں پنجاب کے 13 اضلاع میں دیہی خواتین کومویشی دیں گے۔ملتان، رحیم یارخان، تونسہ، بہاولنگر، خانیوال، وہاڑی اور لودھراں میں دیہی خواتین میں مفت مویشی تقسیم کیے جائیں گے۔ مفت جانوروں کی تقسیم میں ڈیرہ غازی خان، مظفرگڑھ، راجن پور،لیہ، کوٹ ادو اور بہاولپور بھی شامل ہیں۔مفت مویشی پروگرام میں 55 سال تک کی دیہی خواتین (مطلقہ/بیوہ) اہل ہوں گی۔ پنجاب سوشل پروٹیکشن اتھارٹی سے مطلقہ/بیوہ حیثیت کی تصدیق ہونا لازم ہے۔ پچھلے پانچ سال میں کسی بھی سکیم سے مویشی لینے والے دوبارہ نہیں لے سکیں گے۔ درخواست کنندہ گان کیلئے قریبی ویٹرنری ہسپتال/شفاخانہ حیوانات پر وزیراعلیٰ سہولت ڈیسک بھی قائم کر دیئے گئے ہیں۔ درخواست گزار آن لائن پورٹلattrw.punjab.gov.pkپر اپلائی کرسکتے ہیں۔ وزیراعلیٰ مریم نواز شریف کا کہنا ہے کہ دیہی خواتین کو معاشی دھارے میں لاکر ہی غربت جیسے چیلنج سے نمٹاجاسکتا ہے۔ دیہی خواتین کو پائیدار لائیو سٹاک میں معاونت اور مالی امداد سے ہی خودمختار بنایا جاسکتا ہے۔