وزیرِ اعلیٰ پنجاب کے معاون خصوصی شعیب مرزا کا نویں محرم کے انتظامات کا جائزہ

سرگودھا(نمائندہ خصوصی) معاونِ خصوصی وزیرِ اعلیٰ پنجاب برائے انسپیکشن ٹیم شعیب مرزا نے نویں محرم الحرام کے بھلوال میں عزاداری جلوس کے سکیورٹی و دیگر انتظامات کا تفصیلی جائزہ لیا۔ڈپٹی کمشنر حسین احمد رضا چوہدری اور ضلعی پولیس آفیسر صہیب اشرف بھی ان کے ہمراہ تھے۔شعیب مرزا نے جلوس کے روٹس، طبی کیمپس، سبیلوں، داخلی و خارجی راستوں کی سکیورٹی، صفائی ستھرائی اور دیگر سہولیات کا معائنہ کیا۔انہوں نے کہا کہ وزیراعلیٰ پنجاب کی خصوصی ہدایات کے مطابق محرم الحرام کے دوران فول پروف سکیورٹی، بہترین انتظامی ہم آہنگی اور عزاداروں کو ہر ممکن سہولتوں کی فراہمی یقینی بنائی جا رہی ہے۔ انہوں نے جلوس کے منتظمین سے ملاقات کرتے ہوئے وقت کی پابندی، ضابطہ اخلاق پر عملدرآمد اور پرامن ماحول کے قیام کی ضرورت پر زور دیا۔ ان کا کہنا تھا کہ یومِ عاشور کے موقع پر اتحاد، بھائی چارے اور مذہبی ہم آہنگی کو فروغ دینا ہم سب کی مشترکہ ذمہ داری ہے اور تمام مکاتبِ فکر کو مل کر اس مقدس موقع کو پرامن انداز میں کامیاب بنانا ہوگا۔ معاونِ خصوصی نے سخت موسمی حالات میں فرائض سرانجام دینے والے رضاکاروں، پولیس اہلکاروں، ضلعی انتظامیہ اور دیگر متعلقہ اداروں کی فیلڈ اسٹاف کی خدمات کو سراہتے ہوئے کہا کہ تمام ادارے ایک ٹیم کی صورت میں کام کر رہے ہیں۔ انہوں نے کہا کہ شرپسند عناصر سوشل میڈیا یا دیگر ذرائع سے انتشار پھیلانے کی کوشش کرتے ہیں، تاہم اتحاد و یکجہتی کے ذریعے ان کے مذموم عزائم کو ناکام بنایا جائے گا۔ اس موقع پر ڈپٹی کمشنر نے ضلع بھر میں آج شبِ عاشور اور کل یومِ عاشور کے انتظامات کے حوالے سے تفصیلی بریفنگ دی، جبکہ ڈی پی او نے سکیورٹی پلان، نفری کی تعیناتی، چیکنگ کے نظام اور دیگر حفاظتی اقدامات سے متعلق آگاہ کیا۔