مکہ مکرمہ۔(نمائندہ خصوصی):سعودی عرب کی وزارتِ داخلہ نے مکہ مکرمہ کے داخلی راستوں پر کارروائی کرتے ہوئے 5 مقامی شہریوں اور 5 غیر ملکیوں سمیت 10 افراد کو گرفتار کر لیا ہے، جنہوں نے حج قوانین کی سنگین خلاف ورزی کرتے ہوئے بغیر اجازت نامہ حج کی کوشش کرنے والے 34 افراد کو ممنوعہ علاقوں میں منتقل کرنے کی کوشش کی تھی۔سعودی وزارتِ داخلہ کے مطابق سیزنل ایڈمنسٹریٹو کمیٹیوں نے اس خلاف ورزی میں ملوث ٹرانسپورٹرز اور افراد کے 
خلاف فوری انتظامی فیصلے جاری کر دیے ہیں۔ ان سزاؤں کے تحت غیر قانونی طور پر عازمین کو منتقل کرنے والوں پر ایک لاکھ سعودی ریال تک کا بھاری مالی جرمانہ، قید کی سزا اور میڈیا پر ان کی تشہیر (نام عام کرنا) شامل ہے۔ اس کے ساتھ ہی بغیر اجازت نامہ حج کی کوشش کرنے والے افراد پر بھی 20 ہزار ریال تک کا جرمانہ عائد کیا گیا ہے۔انتظامی فیصلوں میں یہ بھی واضح کیا گیا ہے کہ سزا کی مدت مکمل ہونے کے بعد تمام ملوث غیر ملکیوں کو مملکت سے بے دخل (ڈِپورٹ) کر دیا جائے گا اور ان کے اگلے 10 سال تک سعودی عرب میں داخلے پر مستقل پابندی ہوگی۔ اس کے علاوہ خلاف ورزی کے لیے استعمال ہونے والی گاڑیوں کو بھی عدالتی حکم کے تحت ضبط کرنے کی منظوری دی گئی ہے۔سعودی وزارتِ داخلہ نے ایک بار پھر تمام مقامی شہریوں اور مقیم غیر ملکیوں (تارکینِ وطن) پر زور دیا ہے کہ وہ حج کے ضوابط اور سرکاری ہدایات کی سختی سے پاسداری کریں، اور خبردار کیا ہے کہ ضابطوں کی خلاف ورزی کرنے والوں کے خلاف بلا امتیاز سخت قانونی کارروائی عمل میں لائی جائے گی
حج قوانین کی خلاف ورزی،بغیر اجازت نامہ عازمین کو مکہ منتقل کرنے والے 10 ٹرانسپورٹرز گرفتار، بھاری جرمانے اور قید کی سزائیں
