اسلام آباد(نمائندہ خصوصی):ریاستی سرپرستی میں بھارتی مہلک ادویات دنیا بھرکے مختلف ممالک میں عوام کی زندگیاں نگلنے لگیں اور بھارتی دواساز کمپنیاں دنیا بھر میں منشیات کے فروغ اور لوگوں میں ذہنی و جسمانی تباہی کا باعث بن گئیں ۔ تفصیلات کے مطابق عالمی جریدہ فارمیسی بزنس نے دنیا بھرمیں منشیات کے پھیلاؤ میں گمراہ کن بھارتی کردار کی قلعی کھول دی ۔ برطانوی جریدہ فارمیسی بزنس کی رپورٹ کے مطابق بھارتی دوا ساز کمپنیاں مہلک ادویات کے ذریعے افریقہ میں منشیات یعنی ’’زومبی ڈرگ‘‘بحران کو بڑھا رہی ہیں۔ امریکا میں بھی بھارتی اوپیئڈ
ادویات کے استعمال سے تقریباً10 لاکھ اموات ہو چکی ہیں جس کے بعد سخت پابندیاں لگائی گئیں۔ رپورٹ کے مطابق بھارت سے ہر ماہ بغیر اجازت لاکھوں ڈالر مالیت کی مصنوعی اوپیئڈ ادویات نائجیریا،سیرا لیون اور گھانا بھیجی جا رہی ہیں، بھارت سے آنے والی یہی مہلک ادوایات خطے میں تیزی سے خطرناک منشیات کے استعمال کو بڑھا رہی ہیں، بھارتی مہلک ادویات کے باعث افریقی ملک سیرا لیون کے دارالحکومت میں3ماہ میں400افراد ہلاک ہوئے، بھارتی منشیات کو دہشت گردوں سمیت دیگر جرائم پیشہ نیٹ ورکس بھی استعمال کرکے مجرمانہ سرگرمیاں انجام دیتےہیں۔ ماہرین کے مطابق بھارتی مہلک کھانسی کے شربت سے بھی ازبکستان میں18، گیمبیا میں تقریباً70 اورمقبوضہ کشمیر میں12 بچوں کی اموات ہوئیں ، بھارتی ریاستی سرپرستی میں دنیا بھرمیں منشیات کے فروغ سے زندگیوں کی تباہی کے بعد عالمی برداری کی بھارت پر پابندیاں ناگزیر ہیں۔
ریاستی سرپرستی میں بھارتی مہلک ادویات دنیا بھرکے مختلف ممالک میں عوام کی زندگیاں نگلنے لگیں
