چین کا امریکا کی جانب سے تائیوان خطے کو ہتھیار فروخت کرنے کی مخالفت کا موقف مستقل اور واضح ہے،چینی وزارت خارجہ

بیجنگ۔(نمائندہ خصوصی):چین نے کہا ہے کہ چین کا امریکا کی جانب سے چین کے تائیوان خطے کو ہتھیار فروخت کرنے کی مخالفت کا موقف مستقل اور واضح ہے۔ سی جی ٹی این کے مطابق چین کی وزارت خارجہ کے ترجمان گو جیا کھون نے چین۔امریکا اقتصادی و تجارتی تعلقات کے حوالےسے کہا کہ چین اور امریکاکے اقتصادی و تجارتی تعلقات کی بنیاد باہمی مفاد اور مشترکہ کامیابی پر قائم ہے۔انہوں نے کہا کہ فریقین کو چاہیے کہ دونوں سربراہانِ مملکت کے درمیان طے پانے والے اہم اتفاقِ رائے پر مشترکہ طور پر عملدرآمد کریں تاکہ چین۔امریکا اقتصادی و تجارتی تعاون اور عالمی معیشت میں مزید استحکام پیدا کیا جا سکے۔امریکی صدر ٹرمپ کے دورہ چین کے دوران، دونوں ممالک کے سربراہان چین-امریکا تعلقات اور عالمی امن و ترقی سے متعلق اہم امور پر تفصیلی تبادلہ خیال کریں گے۔گو جیاکھون نے کہا کہ چین کا امریکا کی جانب سے چین کے تائیوان خطے کو ہتھیار فروخت کرنے کی مخالفت کا موقف مستقل اور واضح ہے۔ہانگ کانگ کی کمپنیوں سمیت 12 افراد اور اداروں پر امریکی محکمہ خزانہ کی جانب سے پابندی عائد کرنے کے فیصلے کے حوالےسے گو جیا کھون نے کہا کہ چین بین الاقوامی قانون کی بنیاد اور اقوامِ متحدہ کی سلامتی کونسل کی منظوری کے بغیر عائد کی جانے والی یکطرفہ اور غیر قانونی پابندیوں کی سخت مخالفت کرتا ہے اور اپنے اداروں و کمپنیوں کے جائز اور قانونی حقوق و مفادات کا بھرپور تحفظ جاری رکھے گا۔