اسلام آباد(نمائندہ خصوصی):وفاقی وزیر اطلاعات و نشریات عطاء اللہ تارڑ نے کہا ہے کہ میڈیا ورکرز کے حقوق کا تحفظ ہماری اولین ترجیح ہے، اتحادیوں اور اپوزیشن کے ساتھ مل کر صحافیوں کے مسائل حل کئے جائیں گے، 170 ملازمین کو برطرف کرنے والے ٹی وی چینل کے اشتہارات فی الفور بند کر دیئے گئے ہیں۔ پیر کو قومی اسمبلی اجلاس میں صحافیوں کے واک آئوٹ پر شازیہ مری کی جانب سے اٹھائے گئے نکات کا جواب دیتے ہوئے وفاقی وزیر اطلاعات و نشریات عطاء اللہ تارڑ نے کہا کہ میڈیا ورکرز کا تحفظ ہماری اولین ترجیح ہے، وفاقی و صوبائی حکومتیں میڈیا چینلز کے لئے آسانیاں پیدا 
کرنے اور انہیں مالی طور پر مستحکم کرنے کے لئے دن رات کوشاں ہیں۔ انہوں نے کہا کہ میڈیا ورکرز کے حقوق کے تحفظ کو یقینی بنایا جائے گا۔ انہوں نے کہا کہ پاکستان براڈ کاسٹنگ ایسوسی ایشن سے صحافیوں کے روزگار کے تحفظ کا معاملہ اٹھایا جائے گا اور صحافیوں کی جاب سکیورٹی اور مراعات کے حوالے سے معاملات طے کئے جائیں گے۔انہوں نے کہا کہ میڈیا ورکرز کے مسائل کے حل کے لئے اقدامات اٹھائے جائیں گے، اتحادیوں اور اپوزیشن کے ساتھ مل کر صحافیوں کے مسائل حل کئے جائیں گے۔ بعد ازاں وفاقی وزیر اطلاعات و نشریات عطاء اللہ تارڑ نے واک آئوٹ کرنے والے صحافیوں سے ملاقات کی اور ان کے مسائل سنے۔ انہوں نے کہا کہ برطرف کئے جانے والے صحافیوں کی ایک فہرست تیار کرلیں، یہاں بہت سے ایسے ادارے ہیں جنہیں ہیومن ریسورس کی ضرورت ہے۔ وفاقی وزیر اطلاعات نے پریس گیلری کے ارکان کی جانب سے واک آئوٹ ختم کرنے کے بعد ایوان میں گفتگو کرتے ہوئے پریس گیلری کے ممبران کا شکریہ ادا کیا۔ انہوں نے کہا کہ 170 ملازمین برطرف کرنے والے چینل کے اشتہارات فی الفور بند کر دیئے گئے ہیں۔ انہوں نے مزید کہا کہ ایک ٹی وی چینل نے تین ماہ سے تنخواہیں ادا نہیں کیں، اس کی انتظامیہ کو اسلام آباد بلایا گیا ہے تاکہ ان کے ساتھ معاملے کو حل کیا جا سکے۔وفاقی وزیر اطلاعات نے پریس گیلری کے صحافیوں کا واک آئوٹ ختم کرانے میں شازیہ مری، سحر کامران، عابد شیر علی سینیٹر ناصر بٹ کا بھی شکریہ ادا کیا۔
میڈیا ورکرز کے حقوق کا تحفظ ہماری اولین ترجیح ہے، 170 ملازمین کو برطرف کرنے والے ٹی وی چینل کے اشتہارات فی الفور بند کر دیئے گئے ہیں، عطاء اللہ تارڑ
