وزیر اعظم کی چھوٹے و درمیانے درجے کے کاروبار اور صنعتوں کو حکومتی سہولیات کی فراہمی کے لیے لائحہ عمل تیار کرنے کی ہدایت

اسلام آباد۔(نمائندہ خصوصی):وزیراعظم محمد شہباز شریف نے برآمدات پر مبنی صنعت کو ملکی ترقی کے اہداف کے حصول کے لئے نا گزیر قرار دیتے ہوئے چھوٹے اور درمیانے درجے کے کاروبار اور صنعتوں کو حکومتی سہولیات فراہم کرنے کے لیے لائحہ عمل تیار کرنے کی ہدایت کی ہے۔ وزیراعظم محمد شہباز شریف کی زیر صدارت ملکی برآمدات میں اضافے کے حوالے سے حکمت عملی پر اجلاس پیر کو یہاں منعقد ہوا جس میں نائب وزیراعظم و وزیر خارجہ محمد اسحاق ڈار ، وفاقی وزیر اقتصادی امور احد خان چیمہ ، وفاقی وزیر تجارت جام کمال خان ، وفاقی وزیر قومی غذائی تحفظ و تحقیق رانا تنویر حسین ، وفاقی وزیر موسمیاتی تبدیلی مصدق ملک ، وفاقی وزیر خزانہ و محصولات محمد اورنگزیب ، وفاقی وزیر انفارمیشن ٹیکنالوجی و ٹیلی کام شزا فاطمہ ،وزیر مملکت برائے خزانہ و ریلوے بلال اظہر کیانی ، وزیراعظم کے معا ون خصوصی برائے صنعت و پیداوار ہارون اختر اور متعلقہ اعلیٰ سرکاری افسران نے شرکت کی ۔وزیر اعظم آفس کے میڈیا ونگ کی طرف سے جاری بیان کے مطابق وزیر اعظم نے اجلاس سے خطاب کرتے ہوئے ہدایت کی کہ ایسے نئے کاروباروں اور صنعتوں کے فروغ کے لیے حکمت عملی مرتب کی جائے جو ملکی برآمدات میں اضافے کا باعث بنیں۔ انہوں نے برآمدات پر مبنی صنعت کو ملکی ترقی کے اہداف کے حصول کے لئے نا گزیر قرار دیتے ہوئے کہا کہ حکومت اپنی توجہ برآمدات میں اضافے اور صنعتوں کو سہولیات فراہم کرنے پر مرکوز کئے ہوئے ہے۔انہوں نے ہدایت کی کہ ایسےچھوٹے اور درمیانے درجے کے کاروبار اور صنعتیں جو کہ برآمدات میں اضافے کے حوالے سے اہم ہیں، کو حکومتی سہولیات فراہم کرنے کے حوالےسے لائحہ عمل تیار کیا جائے۔ وزیر اعظم نے کہا کہ ملکی صنعت اور تجارت میں ریسرچ اینڈ ڈویلپمنٹ اور جدت ملکی مصنوعات کو عالمی مارکیٹ میں مسابقت دلانے میں مددگار ثابت ہو گی ۔ وزیر اعظم نے برآمد کنندگان کو ٹیکس ریفنڈ کی بروقت ادائیگی کی ہدایت کی۔اجلاس کو ملکی برآمدات میں اضافے کے حوالے سے حکمت عملی پر بریفنگ دی گئی۔ پالیسی مسودے پر اجلاس میں بحث بھی کی گئی اور شرکا نے اپنی اپنی آراء اور تجاویز پیش کیں۔