صدربنگلہ دیش کرکٹ بورڈ کی جانب سے محسن نقوی کے اعزاز میں خصوصی تقریب کا اہتمام

لاہور(اسپورٹس رپورٹر):بنگلہ دیش کرکٹ بورڈ کے صدر تمیم اقبال کی جانب سے چیئرمین پاکستان کرکٹ بورڈ محسن نقوی کے اعزاز میں ڈھاکہ میں خصوصی تقریب کا اہتمام کیا گیا،جس میں پاکستانی قومی کرکٹ ٹیم کے کھلاڑیوں، کوچز اور مینجمنٹ نے بھی شرکت کی۔پی سی بی کی لاہور سے جاری کردہ پریس ریلیز کے مطابق تقریب کے موقع پر بنگلہ دیش کرکٹ بورڈ کے صدر نے محسن نقوی اور قومی اسکواڈ کے اعزاز میں عشائیہ بھی دیا۔ اس دوران تمیم اقبال اور محسن نقوی کے درمیان دونوں ممالک میں کرکٹ کے فروغ اور باہمی تعاون بڑھانے کے حوالے سے تفصیلی تبادلہ خیال کیا گیا۔اس موقع پر تمیم اقبال نے چیئرمین پی سی بی اور پاکستانی وفد کو ڈھاکہ آمد پر خوش آمدید کہتے ہوئے کہا کہ آپ کو دل کی گہرائیوں سے خوش آمدید کہتے ہیں۔چیئرمین پی سی بی محسن نقوی نے گفتگو کرتے ہوئے کہا کہ بنگلہ دیش کے ساتھ پاکستان کے کرکٹ کے ساتھ دل کے رشتے بھی جڑے ہوئے ہیں، جبکہ دونوں ممالک کے درمیان کرکٹ سیریز نے دوطرفہ تعلقات کو مزید مضبوط بنایا ہے۔محسن نقوی نے شاندار مہمان نوازی پر بنگلہ دیش کرکٹ بورڈ کے صدر کا شکریہ بھی ادا کیا۔