معرکہ حق نے پاکستان کا عالمی مقام بلند کیا، آج ہر محب وطن پاکستانی سر اٹھا کر چل رہا ہے،سینیٹر روبینہ خالد

اسلام آباد(نمائندہ خصوصی):چیئرپرسن بے نظیر انکم سپورٹ پروگرام (بی آئی ایس پی) سینیٹر روبینہ خالد نے کہا ہے کہ معرکہ حق کی کامیابی نے دنیا بھر میں پاکستان کی ساکھ میں اضافہ کیا ہے۔ہفتہ کو ’’اے پی پی‘‘ کے ساتھ خصوصی گفتگو کرتے ہوئے سینیٹر روبینہ خالد نے کہا کہ آج دنیا بھر میں پاکستان کا جو مثبت امیج ہے ،یہ معرکہ حق کے مرہون منت ہے۔ انہوں نے کہا کہ آپریشن بنیان مرصوص کے دوران ہماری مسلح افواج نے جس پیشہ ورانہ مہارت، بہادری اور تزویراتی صلاحیتوں کے ساتھ ہندوستان کا مقابلہ کیا، وہ پوری قوم کے لیے باعث فخر ہے۔انہوں نے کہا کہ آج ہر محب وطن پاکستانی سر اٹھا کر چل رہا ہے،اسلام آباد میں امن مذاکرات کی میزبانی پاکستان کی ایک بڑی سفارتی فتح تھی جس سے عالمی سطح پر ملک کا موقف مزید مستحکم ہوا ہے۔بی آئی ایس پی کی چیئرپرسن نے وطن کی خاطر اپنے پیاروں کی قربانی دینے والی مائوں، بہنوں اور بیٹوں کو زبردست خراج تحسین پیش کیا۔ انہوں نے کہا کہ پوری قوم کو اپنے شہداء اور ہیروز پر فخر ہے۔سینیٹر روبینہ خالد نے اس بات پر زور دیا کہ سیاسی اختلافات کے باوجود پاکستان ہمیشہ ہر محب وطن شہری کے لیے اول رہا۔ انہوں نے کہا کہ آج پاکستان کی جو عزت اور وقار ہے وہ ہماری مسلح افواج کی قربانیوں سے حاصل ہوا ہے۔انہوں نے کہا کہ پاکستانی پاسپورٹ آج بیرون ملک مقیم پاکستانیوں کے لیے ’’فخر کا پاسپورٹ‘‘ بن گیا ہے ، یہ تبدیلی معرکہ حق کی عظیم فتح سے ممکن ہوئی ہے۔