معرکۂ حق قوم کو اپنے بہادر محافظوں اور عوام کی جرات، قربانی اور غیر متزلزل عزم کی یاد دلا تا ہے، وجیہہ قمر

اسلام آباد۔(نمائندہ خصوصی):وزیرِ مملکت برائے وفاقی تعلیم و پیشہ ورانہ تربیت وجیہہ قمر نے کہا ہے کہ معرکۂ حق کی پہلی یادگاری تقریب قوم کو اپنے بہادر محافظوں اور عوام کی جرات، قربانی اور غیر متزلزل عزم کی یاد دلاتی ہے۔ ہفتہ کو ’’اے پی پی‘‘ سے گفتگو کرتے ہوئے انہوں نے کہا کہ معرکۂ حق قومی وقار، اتحاد اور ثابت قدم ایمان کی علامت ہے، جبکہ وطن کی عزت اور سلامتی کے لیے دی جانے والی قربانیاں ہمیشہ آنے والی نسلوں کے لیے مشعلِ راہ رہیں گی۔انہوں نے کہا کہ قوم اپنے ان ہیروز کو خراجِ تحسین پیش کرتی ہے جن کی بہادری اور عزم نے ہر چیلنج کے مقابلے میں حق اور سچائی کو سربلند رکھا۔انہوں نے زور دیا کہ پاکستان کی اصل طاقت اتحاد، حب الوطنی اور امن، ترقی اور خوشحالی کے لیے اجتماعی عزم میں مضمر ہے۔ وجیہہ قمر نے تعلیم کے فروغ، قومی ہم آہنگی اور جامع ترقی کے لیے حکومت کے عزم کا اعادہ کرتے ہوئے کہا کہ ایک پُرامن، ترقی یافتہ اور متحد قوم ہی شہداء کی قربانیوں کا حقیقی خراجِ عقیدت ہے۔انہوں نے شہداء کے درجات کی بلندی اور ملک میں دیرپا امن، استحکام اور خوشحالی کے لیے دعا بھی کی۔