اسلام آباد(نمائندہ خصوصی):چیئرمین ہائر ایجوکیشن کمیشن (ایچ ای سی) ڈاکٹر نیاز احمد نے نیشنل سینٹر ان بگ ڈیٹا اینڈ کلائوڈ کمپیوٹنگ (این سی بی سی) کی کارکردگی کا جائزہ لینے کے لیے ایچ ای سی سیکرٹریٹ اسلام آباد میں ایک اہم اجلاس کی صدارت کی جس میں ملک بھر سے منسلک تحقیقی لیبارٹریز کے نمائندگان نے شرکت کی۔اجلاس کے دوران چیئرمین کو تحقیق، کمرشلائزیشن اور مالی پائیداری سے متعلق اہداف پر ہونے والی پیش رفت کے بارے میں تفصیلی
بریفنگ دی گئی۔ انہیں بتایا گیا کہ این سی بی سی نے قومی سطح کا ڈیٹا ریپوزٹری قائم کر لیا ہے جبکہ متعدد ذیلی لیبارٹریز نے جدت اور کمرشلائزیشن کے ذریعے مالی خود کفالت بھی حاصل کر لی ہے۔ ڈاکٹر نیاز احمد نے مرکز کی مجموعی کارکردگی کو سراہتے ہوئے ہدایت کی کہ سٹارٹ اپس کے قیام، آمدن میں اضافے اور تحقیق کو تجارتی بنیادوں پر فروغ دینے کی رفتار کو مزید تیز کیا جائے۔ انہوں نے اس امر پر زور دیا کہ این سی بی سی کی سرگرمیوں کو قومی ترجیحات سے ہم آہنگ رکھتے ہوئے طویل المدتی اثرات کو یقینی بنایا جائے۔ انہوں نے کہا کہ جدید ٹیکنالوجی کے میدان میں تحقیق اور اس کی موثر کمرشلائزیشن نہ صرف معیشت کو مضبوط بنائے گی بلکہ پاکستان کو عالمی سطح پر مسابقتی بنانے میں بھی اہم کردار ادا کرے گی۔
چیئرمین ایچ ای سی کی زیرصدارت نیشنل سینٹر ان بگ ڈیٹا اینڈ کلائوڈ کمپیوٹنگ کی کارکردگی کا جائزہ اجلاس
