سانیا (نمائندہ خصوصی)صدر مملکت آصف علی زرداری نے کہا ہے کہ پاکستان اور چین ’’ہر موسم کے سٹریٹجک شراکت دار‘‘ ہیں اور چین ک ساتھ دوستی پاکستان کی خارجہ پالیسی کا سنگ بنیاد ہے جسے عوامی اور ادارہ جاتی سطح پر وسیع حمایت حاصل ہے، رواں سال دونوں ممالک کے درمیان سفارتی تعلقات کے قیام کی 75ویں سالگرہ منائی جا رہی ہے اور اس حوالے سے جاری تقریبات دوطرفہ تعلقات کو مزید مستحکم کرنے اور تعاون کے نئے مواقع پیدا کرنے میں مدد گار ہوں گی، چین کے صوبے ہائنان کی سیاحت، ہائی ٹیک صنعت اور استوائی زراعت میں ترقی کو باہمی تعاون کے عملی مواقع قرار دیتے ہوئے ہائنان کی کمپنیوں اور پاکستان کے صنعتی و برآمدی شعبوں کے درمیان روابط بڑھانے پر زور دیا تاکہ دوطرفہ تجارت میں اضافہ ہو سکے سانیا میں منعقدہ چھٹے ایشین بیچ گیمز میں پاکستانی کھلاڑیوں کی شرکت مثبت پیش رفت ہے ۔ ہائنان قیادت کے ساتھ تجارت اور سرمایہ کاری کے روابط مزید گہرے کرنے کی خواہش ہے۔
ان خیالات کا اظہار صدر مملکت آصف علی زرداری نے دورہ چین کے دوران ہائنان کے پارٹی سیکرٹری فینگ فئی ، صوبے کے گورنر لیو شیائومنگ اور شہر سانیا کے پارٹی سیکرٹری وانگ چی یانگ سے ملاقات کے دوران کیا۔ اس موقع پر پاکستان اور ہائنان کے درمیان معاشی تعاون کو فروغ دینے، تجارتی روابط بڑھانے اور عوامی سطح پر تبادلوں کو مضبوط بنانے پر تبادلہ خیال کیا گیا۔ صدر مملکت نے حکومت ہائنان کی جانب سے پرتپاک استقبال اور میزبانی کو سراہتے ہوئے اس بات کا ذکر کیا کہ ہائنان بین الاقوامی تجارت اور سرمایہ کاری کے ایک اہم گیٹ وے کے طور پر تیزی سے ابھرا ہے۔انہوں نے اس بات کا اعادہ کیا کہ پاکستان اور چین ’’ہر موسم کے سٹریٹجک شراکت دار‘‘ ہیں اور چین کے ساتھ دوستی پاکستان کی خارجہ پالیسی کا سنگ بنیاد ہے جسے عوامی اور ادارہ جاتی سطح پر وسیع حمایت حاصل ہے۔ انہوں نے کہا کہ رواں سال دونوں ممالک کے درمیان سفارتی تعلقات کے قیام کی 75ویں سالگرہ منائی جا رہی ہے اور اس ضمن میں جاری تقریبات دوطرفہ تعلقات کو مزید مستحکم کرنے اور تعاون کے نئے مواقع پیدا کرنے میں معاون ہوں گی۔انہوں نے ہائنان کی سیاحت، ہائی ٹیک صنعت اور استوائی زراعت میں ترقی کو باہمی تعاون کے عملی مواقع قرار دیتے ہوئے ہائنان کی کمپنیوں اور پاکستان کے صنعتی و برآمدی شعبوں کے درمیان روابط بڑھانے پر زور دیا تاکہ دوطرفہ تجارت میں اضافہ ہو سکے۔ انہوں نے عوامی سطح پر روابط کی اہمیت پر بھی زور دیا اور سانیا میں منعقدہ چھٹے ایشین بیچ گیمز میں پاکستانی کھلاڑیوں کی شرکت کو ایک مثبت پیش رفت قرار دیا۔صدر مملکت نے چین بالخصوص ہائنان کے ساتھ زراعت، بندرگاہوں کی ترقی، بیج ٹیکنالوجی اور ماہی گیری کے شعبوں میں تعاون بڑھانے میں پاکستان کی دلچسپی کا اظہار کیا۔ انہوں نے کہا کہ پاکستانی اور چینی تہذیبوں کے درمیان صدیوں پر محیط روابط موجود ہیں اور دونوں ممالک مستقبل میں بھی مشترکہ ترقی کی راہ پر گامزن رہیں گے۔صدر مملکت نے کہا کہ ان کے خاندان کے چین کے ساتھ تعلقات تین نسلوں پر محیط ہیں جن کا آغاز ان کے مرحوم سسر ذوالفقار علی بھٹو اور بینظیر بھٹو سے ہوا اور اب ان کے صاحبزادے بلاول بھٹو زرداری اور صاحبزادی آصفہ بھٹو زرداری تک جاری ہے۔دونوں فریقین نے علاقائی اور عالمی امور پر بھی تبادلہ خیال کیا اور امن، استحکام، مکالمے اور تعاون کے فروغ کے عزم کا اعادہ کیا۔پارٹی سیکرٹری فینگ فئی نے صدر اور ان کے وفد کا خیرمقدم کرتے ہوئے چین کے ساتھ پاکستان کی دیرینہ دوستی کو سراہا۔ انہوں نے ہائنان کی فری ٹریڈ پورٹ کے طور پر ترقی اور عالمی تجارت و سرمایہ کاری میں اس کے بڑھتے ہوئے کردار کو اجاگر کیا۔ انہوں نے بتایا کہ دسمبر 2025ء میں خصوصی کسٹمز آپریشنز کے آغاز کے بعد ہائنان میں غیر ملکی سرمایہ کاروں کی تعداد اور درآمدی اشیاء کی مالیت میں نمایاں اضافہ ہوا ہے ۔ رواں سال کی پہلی سہ ماہی میں ہائنان چین کے سب سے زیادہ فعال خطوں میں شامل ہو چکا ہے۔ انہوں نے کہا کہ اسی عرصے کے دوران پاکستان اور ہائنان کے درمیان تجارت تقریباً دوگنا ہو چکی ہے۔سیکرٹری فینگ نے کہا کہ اس وقت ہائنان کی مختلف جامعات میں 500 سے زائد پاکستانی طلبہ زیرِ تعلیم ہیں اور صدر مملکت کا یہ دورہ دونوں ممالک کے سفارتی تعلقات کی 75ویں سالگرہ کے موقع پر ہو رہا ہے،خصوصی اہمیت کا حامل ہے۔ انہوں نے مزید کہا کہ چین کی سب سے بڑی بیج افزائش لیبارٹری ہائنان میں واقع ہے جہاں بائیوٹیکنالوجی اور مصنوعی ذہانت سمیت جدید ٹیکنالوجیز استعمال ہو رہی ہیں اور اس شعبے میں پاکستان کے ساتھ تعاون کے وسیع امکانات موجود ہیں۔انہوں نے مختلف شعبوں میں دونوں ممالک کے درمیان ہر موسم کی سٹریٹجک شراکت داری کو مزید مستحکم بنانے کے چین کے عزم کا اعادہ کیا۔ ملاقات میں سینیٹر سلیم مانڈوی والا، سینئر صوبائی وزیرشرجیل انعام میمن علی حسن بروہی، سید قاسم نوید قمر وزیراعلیٰ سندھ کے معاون خصوصی برائے سرمایہ کاری و پبلک پرائیویٹ پارٹنرشپ چیف سیکرٹری سندھ، پاکستان میں چین کے سفیر جیانگ زائی دونگ اور چین میں پاکستان کے سفیر خلیل ہاشمی سمیت دیگر حکام بھی شریک تھے۔ملاقات کے بعد صدر مملکت کے اعزاز میں عشائیہ بھی دیا گیا
پاکستان اور چین ’’ہر موسم کے سٹریٹجک شراکت دار‘‘ ہیں، چین کے ساتھ دوستی پاکستان کی خارجہ پالیسی کا سنگ بنیاد ہے، صدر مملکت آصف علی زرداری
