مسیحی اراکینِ اسمبلی کاسابق وفاقی وزیر اور سینیٹر کامران مائیکل کی قیادت پر مکمل اعتماد اور حمایت کا اعلان

اسلام آباد۔( نمائندہ خصوصی):پنجاب اسمبلی کے مسیحی اراکینِ اسمبلی نے سابق وفاقی وزیر اور سینیٹر کامران مائیکل سے ملاقات میں ان کی قیادت پر مکمل اعتماد کا اظہار کرتے ہوئے غیر مشروط حمایت کا اعلان کر دیا۔ ملاقات کے دوران باہمی مشاورت، قومی یکجہتی اور موجودہ سیاسی صورتحال پر تفصیلی تبادلہ خیال کیا گیا۔اراکین اسمبلی نے اس امر پر زور دیا کہ ملک کو درپیش چیلنجز سے نمٹنے کے لئے قومی اتحاد ناگزیر ہے اور اس کے لئے تمام طبقات کو مل کر کردار ادا کرنا ہوگا۔اس موقع پر فیلبوس کرسٹوفر (چیئرمین کاکس اینڈ سٹینڈنگ کمیٹی برائے انسانی حقوق پنجاب)، سونیا عاشر (پارلیمانی سیکرٹری)، عمانوئیل جولیس، طارق گل، اعجاز آگسٹن، وسیم انجم سندھو اور شکیلہ آرتھر بھی موجود تھے۔اراکین نے اس عزم کا اظہار کیا کہ وہ مستقبل میں سیاسی و قومی مسائل کے حل کے لئے مشترکہ حکمت عملی اپناتے ہوئے مثبت کردار ادا کریں گے۔ ملاقات کے اختتام پر شرکاء نے اس بات کا اعادہ کیا کہ ملک میں ہم آہنگی، رواداری اور استحکام کے فروغ کے ساتھ ساتھ بالخصوص مسیحی برادری سمیت تمام اقلیتوں کو درپیش مسائل کے حل کے لئے اپنی کاوشیں جاری رکھیں گے۔