پاکستان بھر کے 30 فیلڈ دفاتر میں ڈیجیٹل آڈٹ نظام نافذ

اسلام آباد۔( نمائندہ خصوصی):حکومت نے پاکستان بھر کے 30 فیلڈ آڈٹ دفاتر میں آڈٹ مینجمنٹ انفارمیشن سسٹم (AMIS) کے نفاذ کو مکمل کر لیا ہے جو پبلک سیکٹر آڈٹ نظام کی ڈیجیٹلائزیشن کی جانب ایک اہم پیشرفت ہے۔ویلتھ پاکستان کو دستیاب سرکاری دستاویزات کے مطابق 28 فیلڈ دفاتر میں تمام آڈٹ ٹیمیں اب فعال طور پر اس نظام کو استعمال کر رہی ہیں جس سے دستی طریقہ کار سے مکمل طور پر ڈیجیٹل آڈٹ نظام کی جانب منتقلی ہو چکی ہے اور AMIS کے نفاذ میں 100 فیصد پیشرفت حاصل کی گئی ہے۔ اہم بات یہ ہے کہ اب AMIS کے ذریعے کئے جانے والے تمام آڈٹس رسک بیسڈ ہیں جس سے زیادہ خطرے والے شعبوں پر توجہ مرکوز کرکے آڈٹ کے معیار کو بہتر بنایا گیا ہے اور وسائل کے مؤثر استعمال کو یقینی بنایا گیا ہے۔ اس تبدیلی سے آڈٹ نظام میں شفافیت اور کارکردگی میں مزید بہتری کی توقع ہے۔ڈیجیٹلائزیشن کے ساتھ ساتھ حکومت نے استعداد کار میں اضافے کے شعبے میں بھی نمایاں پیش رفت کی ہے۔ اس سلسلے میں 3,083 آڈٹ اہلکاروں کو جدید اور ابھرتے ہوئے آڈٹ شعبوں میں تربیت دی گئی، جو 3,500 کے مجموعی ہدف کا 88 فیصد ہے۔یہ تربیتی پروگرام آڈیٹرز کو جدید مہارتوں سے آراستہ کرنے پر مرکوز ہے تاکہ پبلک فنانشل مینجمنٹ میں کارکردگی، شفافیت اور جوابدہی کو بہتر بنایا جا سکے۔ایک اور اہم پیشرفت میں حکومت نے سرٹیفائیڈ آڈیٹرز کے پول کی تیاری کا ہدف بھی عبور کر لیا ہے۔ 800 کے ہدف کے مقابلے میں 947 آڈیٹرز کو تربیت دی گئی، جو 118 فیصد پیش رفت ظاہر کرتی ہے۔ ان میں پروفیشنل اکاؤنٹنسی قابلیت اور خصوصی ڈپلومہ جات شامل ہیں۔ تربیتی ماڈیولز میں مختلف تکنیکی شعبوں کا احاطہ کیا گیا جن میں انٹرنیشنل پبلک سیکٹر اکاؤنٹنگ سٹینڈرڈز (IPSAS)، ڈیٹا اینالیٹکس ٹولز جیسے Qlik Sense کا استعمال اور موضوعاتی و رسک بیسڈ آڈٹنگ تکنیکیں شامل ہیں۔ مجموعی طور پر 478 اہلکاروں کو IPSAS، 248 کو Qlik Sense اور 146 کو موضوعاتی آڈٹس میں تربیت دی گئی، جو ایک جامع اور متنوع استعداد کار کے فروغ کی عکاسی کرتا ہے۔یہ اصلاحات گورننس کے ڈھانچے کو جدید بنانے اور نگرانی کے نظام کو مضبوط کرنے کی وسیع تر کوششوں کا حصہ ہیں۔ ٹیکنالوجی کو انسانی وسائل کی ترقی کے ساتھ مربوط کرنے سے آڈٹ کی کارکردگی بہتر ہونے اور شواہد پر مبنی پالیسی سازی میں مدد ملنے کی توقع ہے۔یہ پیشرفت پبلک سیکٹر میں جوابدہی، شفافیت اور مالی نظم و ضبط کو بہتر بنانے کے لئے حکومت کے مسلسل عزم کو ظاہر کرتی ہے۔