یوم چینی زبان ایک ایسی دنیا میں جو تیزی سے ایک دوسرے سے جڑ رہی ہے، لسانی تفہیم کی عالمی اہمیت کو اجاگر کرتا ہے۔ صدر مملکت آصف علی زرداری

اسلام آباد:( نمائندہ خصوصی)صدر ​مملکت آصف علی زرداری نے کہا ہے کہ یوم چینی زبان ایک ایسی دنیا میں جو تیزی سے ایک دوسرے سے جڑ رہی ہے، لسانی تفہیم کی عالمی اہمیت کو اجاگر کرتا ہے۔پیر کو ایوان صدر کے پریس ونگ سے جاری یوم چینی زبان کے موقع پر اپنے پیغام میں صدر مملکت آصف علی زرداری نے کہا کہ​ پاکستان میں چینی زبان سیکھنے میں دلچسپی میں مسلسل اضافہ ہوا ہے، خاص طور پر جامعات میں جہاں اب باقاعدہ تدریسی پروگرام قائم ہو چکے ہیں۔کراچی یونیورسٹی اور پنجاب یونیورسٹی جیسے اداروں کے ساتھ ساتھ ’نیشنل یونیورسٹی آف ماڈرن لینگویجز‘ (نمل) میں بھی طلبہ کو درجہ بندی کے مطابق تدریس، سرٹیفیکیشن کورسز اور ثقافتی آگاہی کے مواقع فراہم کیے جا رہے ہیں۔انہوں نے کہا کہ ​سندھ میں کراچی یونیورسٹی کا ’کنفیوشس انسٹی ٹیوٹ‘ چینی زبان کی تعلیم کے ایک بڑے مرکز کے طور پر کام کر رہا ہے جہاں مقامی اور چینی اساتذہ کی زیر نگرانی منظم کورسز اور تربیت دی جا رہی ہے۔ملک کے دیگر حصوں میں بھی اسی طرح کے اقدامات نے ان طلبہ اور پیشہ ور افراد کے لیے رسائی کو آسان بنا دیا ہے جو عملی طور پر زبان کی مہارت حاصل کرنا چاہتے ہیں۔صدر مملکت نے کہا کہ​زبان سیکھنے کے اس عمل میں ان سرکاری ملازمین کی خصوصی تربیت بھی شامل ہے جن کے فرائض میں چینی شہریوں کے ساتھ ہم آہنگی پیدا کرنا شامل ہے۔ ایسی تربیت سے باہمی رابطے بہتر ہوتے ہیں اور زمینی سطح پر کام کرنے کے انتظامات مزید موثر ہو جاتے ہیں۔​بہت سے نوجوانوں کے لیے چینی زبان سیکھنا اب محض شوق نہیں بلکہ تعلیم، تجارت اور تکنیکی تعاون کے مواقع سے جڑا ہوا ہے۔یہ ایک ایسی عملی مہارت فراہم کرتی ہے جو چینی کمپنیوں، سکالرشپ پروگراموں اور مختلف شعبوں میں مشترکہ منصوبوں کے ساتھ روابط کو مضبوط بنانے میں مددگار ثابت ہو سکتی ہے۔​جیسے جیسے یہ کام آگے بڑھ رہا ہے، تمام تر توجہ اس بات پر مرکوز رہنی چاہیے کہ زبان کی تعلیم تک رسائی آسان اور منظم ہو تاکہ یہ حقیقی ضرورتوں کو پورا کرے اور دونوں ممالک کے درمیان عملی تعاون کو مزید مستحکم بنا سکے۔