پاکستان کی دفاعی تاریخ کے درخشاں باب معرکہ حق کی پہلی سالگرہ کی تیاریاں ، بنیان مرصوص علاقائی طاقت کے توازن اور برتری میں اہم موڑ

پشاور( نمائندہ خصوصی):پوری پاکستانی قوم معرکہ حق کی پہلی سالگرہ منانے کی تیاریوں میں مصروف ہے جس میں پاکستانی افواج نے اپنے سے تین گنا بڑے دشمن بھارت کے خلاف تاریخی فتح حاصل کی اور اقوامِ عالم میں ایک عالمی لیڈر کے طور پر ابھری۔ معرکہ حق کا یہ عظیم واقعہ 22 اپریل سے 10 مئی 2025 تک محیط رہا جو کہ اس تاریخی فتح کی یادگار کے طور پر خیبر پختونخوا میں مختلف قومی اور صوبائی پلیٹ فارمز پر منایا جا رہا ہے۔ اس کا مقصد پاکستان کی بہادر مسلح افواج کو خراج تحسین پیش کرنا اور موجودہ منتخب حکومت کے اس پختہ عزم کو سراہنا ہے جس نے بزدل بھارت کو تمام محاذوں پر شکست فاش دی۔ خیبر سے کراچی اور گوادر سے چترال تک پاکستان کے تمام صوبوں، آزاد کشمیر اور گلگت بلتستان کے عوام اور صوبائی حکومتی ادارے سول اور عسکری قیادت کو ان کے پختہ عزم، استقامت اور ہمت پر شاندار خراج تحسین پیش کرنے کےلیے تیار ہیں جنہوں نے دشمن کے ناپاک عزائم کو خاک میں ملا دیا اور بھارت کے خلاف زمین، سمندر اور فضا میں تاریخی کامیابی حاصل کی۔ پشاور یونیورسٹی کے شعبہ سیاسیات کے سابق چیئرمین پروفیسر ڈاکٹر اے ایچ ہلالی نے اے پی پی سے گفتگو کرتے ہوئے کہا کہ معرکہ حق کے جذبے نے قومیت، حب الوطنی اور اتحاد کو جلا بخشتے ہوئے ہماری قوم کی مزاحمت، بہادری اور عزم کی عکاسی کی۔ اس نے ملک کی خودمختاری پر سمجھوتہ کیے بغیر تمام بیرونی اور اندرونی چیلنجوں پر قابو پانے اور قومی ترقی و خوشحالی کےلیے جدوجہد کرنے کی ہماری صلاحیت کو دنیا کے سامنے پیش کیا۔ انہوں نے کہا کہ یقیناً 6 اور 7 مئی 2025 کی رات پاکستان اور آزاد کشمیر میں شہری آبادی کو نشانہ بنانے والے بھارت کے بلا اشتعال میزائل اور ڈرون حملوں کے جواب میں فیصلہ کن آپریشن بنیان مرصوص شروع کرنے کے علاوہ پاکستان کے پاس کوئی چارہ نہیں تھا۔ انہوں نے کہا کہ آپریشن بنیان مرصوص صرف ایک فوجی کامیابی نہیں بلکہ علاقائی طاقت کے توازن اور برتری میں ایک اہم موڑ ثابت ہوا۔ یہ ایک مضبوط یاد دہانی ہے کہ پاکستان کی مسلح افواج جنگی مہارت رکھتی ہیں، ایمان کے ساتھ لڑتی ہیں اور روحانی طور پر اتنی مضبوط ہیں کہ انہوں نے تاریخی فتح حاصل کی۔ معرکہ حق قومی اتحاد، عزم اور جوش و ولولے کا باعث بھی بنا جس نے پاکستانی نوجوانوں میں ملک کی ترقی کےلیے ایک نیا راستہ متعین کرنے کا جذبہ پیدا کیا۔ معرکہ حق نے پاکستان کے بنیادی تصور کو دوبارہ زندہ کیا جس کا محور قومی شناخت اور ایک ایسی خوشحال مستقبل پر ہے جو بانی پاکستان قائداعظم کے اصولوں اتحاد، ایمان اور تنظیم کے مطابق ہو۔ اس معرکہ میں قومی قیادت کو عوامی حمایت حاصل رہی۔معرکہ حق کی تین بڑی خصوصیات پاکستان کی مضبوط فوجی کارروائی یا ڈاکٹرائن، قومی اتحاد اور ملک کی خودمختاری کا دفاع ہیں۔ یہ خصوصیات بیرونی خطرات بالخصوص بھارتی پراکسیز کے مقابلے میں ایک متحد قوم کی اہمیت کو واضح کرتی ہیں اور دہشت گردی کی لعنت کے خلاف اجتماعی قومی عزم کی ضرورت پر زور دیتی ہیں۔ معرکہ حق نے پاکستانی قومیت کو ایک نئی طاقت اور دہشت گردی کی لعنت کے خلاف مضبوطی عطا کی۔ انہوں نے کہا کہ پاکستان کے بنیادی وژن سے منسلک رہ کر ہم معاشرے میں رواداری کو فروغ دے کر اور آنے والی نسلوں کےلیے ایک روشن مستقبل بنا کر اس اجتماعی توانائی کو مثبت تبدیلی کےلیے استعمال کر سکتے ہیں۔ قائداعظم کے ایمان، اتحاد اور تنظیم پر توجہ مرکوز کرتے ہوئے ملک معاشی چیلنجوں پر قابو پا سکتا ہے، مقررہ مالی اہداف حاصل کر سکتا ہے اور خوشحال مستقبل کی بنیاد رکھ سکتا ہے۔ انہوں نے کہا کہ پاکستان دو قومی نظریہ کی بنیاد پر تخلیق کیا گیا تھا، ایک قومی وطن کے طور پر اس نظریہ کے ذریعے پاکستان کی شناخت کو دیکھا جاتا ہے اور اس کو نظریاتی شکل دی جاتی ہے۔ ہمارے بنیادی نظریے اور معرکہ حق کے درمیان تعلق فطری طور پر لازم و ملزوم ہے جو ملک کی تاریخ اور سیاسی منظر نامے کے ساتھ گہرا جڑا ہوا ہے اور اسلام کو قومیت کی بنیاد بناتا ہے۔ انہوں نے کہا کہ پاکستانی مسلح افواج کا عظیم آپریشن بنیان مرصوص جو 10 مئی 2025 کو معرکہ حق کے حصے کے طور پر کیا گیا، بھارتی فوج کے ان بزدلانہ حملوں کا جواب تھا جو 6 اور 7 مئی 2025 کی رات شروع ہوئے اور جس کے نتیجے میں پاکستان میں خواتین، بچوں اور معمر شہریوں سمیت معصوم جانوں کا ضیاع ہوا۔ انہوں نے کہا کہ پاکستانی افواج نے آپریشن بنیان مرصوص کے ذریعے بھارتی کھلی جارحیت کا بھرپور جواب دیا، جس میں لائن آف کنٹرول (ایل او سی) کے ساتھ اور اس سے آگے دشمن کے فوجی اثاثوں، گولہ بارود کے ڈپوؤں اور میزائل اڈوں کو کامیابی سے نشانہ بنایا گیا اور انہیں بھاری نقصان پہنچایا گیا۔دشمن کے متعدد جنگی طیارے گرانے کے علاوہ معرکہ حق نے بین الاقوامی توجہ حاصل کی اور کئی ممالک نے پاکستان کے متوازن موقف کا اعتراف کیا۔ پشاور یونیورسٹی کے شعبہ بین الاقوامی تعلقات کے سابق چیئرمین ڈاکٹر اعجاز خان کے مطابق معرکہ حق میں تاریخی کامیابی کے بعد پاکستان ایک عالمی لیڈر کے طور پر ابھرا ہے اور اس کی سفارتی و دفاعی ساکھ اقوامِ عالم میں بلندیوں کو چھو رہی ہے۔ انہوں نے کہا کہ اقوام متحدہ کے چارٹر کے آرٹیکل 51 کے تحت پاکستان کی علاقائی سالمیت کے تحفظ اور بین الاقوامی انسانی قانون کے نفاذ پر توجہ، ہماری بہادر مسلح افواج کے اس غیر متزلزل عزم کی عکاسی کرتی ہے کہ وہ کسی بھی دراندازی یا بیرونی و اندرونی چیلنجوں کا پوری قوت سے مقابلہ کریں گی۔انہوں نے کہا کہ معرکہ حق نے بھارت کو ایک عبرتناک سبق سکھایا کیونکہ اسے زمین، سمندر، فضا اور سفارتی محاذ پر پاکستان کے ہاتھوں شکست کا سامنا کرنا پڑا۔ مزید برآں معرکہ حق نے قائداعظم کے اس قول کی لاج رکھی کہ کشمیر پاکستان کی شہ رگ ہے۔ معرکہ حق نے کشمیریوں کی حق خودارادیت کی طویل جدوجہد کو ایک نئی زندگی فراہم کی ہے جس کا اقوام متحدہ کی سلامتی کونسل نے ان سے وعدہ کیا ہے۔ سب سے اہم بات یہ ہے کہ معرکہ حق کے بعد مسئلہ کشمیر عالمی سطح پر نمایاں ہو کر سامنے آیا ہے اور امریکی صدر ٹرمپ نے کشمیر پر ثالثی کی پیشکش کی۔ سابق سفیر منظور الحق کا کہنا ہے کہ ہماری عالمی فوجی برتری قائم کرنے کے ساتھ ساتھ معرکہ حق نے پاکستان کی جنگی قوت کی بحالی میں نمایاں کردار ادا کیا۔ انہوں نے کہا کہ یہ بہتر تکنیکی ترقی اور جنگی مہارتوں کے ذریعے حاصل کیا گیا جس کے نتیجے میں بھارتی فوجی تنصیبات کے خلاف درست ہدف بنانے کی صلاحیت پیدا ہوئی۔انہوں نے کہا کہ آپریشن بنیان مرصوص نے مختلف قومی اداروں کے درمیان ہم آہنگی اور عوامی حمایت کا بھرپور مظاہرہ کیا۔ مزید برآں پاکستان نے رافیل سمیت بھارت کے مہنگے جنگی طیاروں کو گرا کر اس کی نام نہاد علاقائی برتری کا پول کھول دیا جبکہ پاک فضائیہ نے اپنی عالمی جنگی ساکھ کو نمایاں طور پر بہتر کیا ہے اور غیر ملکی میڈیا نے اسے آسمانوں کا بلا شرکت غیرے بادشاہ قرار دیا۔ بھارتی فضائیہ کے متعدد طیارے گرا کر پاک فضائیہ کی اس شاندار کامیابی نے اس کی جدید ٹیکنالوجی، آپریشنل صلاحیتوں اور بہترین جنگی مہارتوں کا لوہا منوا لیا۔ اس فتح نے، عالمی اعتراف اور بین الاقوامی اعزازات کے ساتھ مل کر پاک فضائیہ کے عالمی وقار اور پیشہ ورانہ مہارت میں مثبت تبدیلی لانے میں بڑا حصہ ڈالا ہے۔سابق سفیر منظور الحق نے کہا کہ پاکستان نے مغربی اور مشرقی دنیا بالخصوص امریکہ اور چین جیسی عالمی طاقتوں کے ساتھ اپنے تزویراتی تعلقات کو بڑھا کر اپنی عالمی دفاعی پوزیشن مستحکم کی۔ معرکہ حق میں پاکستان کی شاندار فتح کے بعد بھارت کا داخلی طور مورال گر گیا اور اسے دنیا میں سفارتی تنہائی کا سامنا کرنا پڑا۔ ماہرین کے مطابق معرکہ حق نے مقامی اور بین الاقوامی سرمایہ کاری کے ذریعے پاکستان کی معیشت کو مضبوط بنانے کی حکومتی کوششوں میں مدد دی۔ انہوں نے کہا کہ آپریشن بنیان مرصوص اس بات کی شہادت ہے کہ پاکستان تمام چیلنجوں پر قابو پانے اور ملک کو تمام خطرات سے بچانے کی تمام تر صلاحیتیں اور وسائل رکھتا ہے۔ ماہرین نے کہا کہ چیف آف ڈیفنس فورسز فیلڈ مارشل سید عاصم منیر کی بصیرت انگیز فوجی قیادت میں پاکستان نے قائداعظم محمد علی جناح کے وژن کو دوبارہ زندہ کیا ہے جس سے قوم کی مزاحمت اور عزم کی توثیق ہوتی ہے۔ انہوں نے کہا کہ وزیراعظم محمد شہباز شریف اور فیلڈ مارشل سید عاصم منیر نے جاری امریکا ایران تنازعہ کے دوران اہم ثالثی کا کردار ادا کیا ہے اور دنیا خطے میں امن و استحکام کےلیے پاکستان کی سفارتی کوششوں کو بھرپور سراہ رہی ہے۔ انہوں نے کہا کہ ملک کی علاقائی سالمیت کا کامیابی سے دفاع کرتے ہوئے معرکہ حق نے حب الوطنی، اتحاد اور شناخت کے اس جذبے کو دوبارہ بیدار کیا ہے جو قائداعظم محمد علی جناح اور علامہ اقبال کی قیادت میں ہمارے بانیانِ ملت کے پیش کردہ قومی نظریات کی بازگشت ہے۔ انہوں نے کہا کہ پاکستان میں بین الاقوامی سرمایہ کاری آنا شروع ہو گئی ہے اور آج ہمارا ملک اقوامِ عالم میں ترقی اور خوشحالی کی راہ پر تیزی سے گامزن ہے۔