طبی سائنس کی بدولت پاکستان نے نمایاں کامیابیاں حاصل کی ہیں،محمد اسلم غوری

اسلام آباد:سیکرٹری برائے قومی صحت محمد اسلم غوری نے کہا ہے کہ طبی سائنس کی بدولت پاکستان نے نمایاں کامیابیاں حاصل کی ہیں، جن میں بچوں کو ویکسین کے ذریعے قابلِ انسداد بیماریوں سے تحفظ، چیچک کا خاتمہ، اور مہلک امراض جیسے تپ دق، پولیو، کینسر، ذیابیطس، ہیپاٹائٹس سی، ملیریا اور شدید غذائی قلت کی روک تھام و علاج شامل ہیں ۔ان خیالات کا اظہار انہوں نے عالمی یوم صحت کے موقع پر منعقدہ تقریب سے خطاب کرتے ہوئے کیا ۔عالمی ادار صحت (ڈبلیو ایچ او) اور وزارت صحت کےحکام نے پیر کو عالمی یومِ صحت کے موقع پر اس امر پر زور دیا کہ گزشتہ آٹھ دہائیوں کے دوران طبی سائنس نے ہر سال لاکھوں زندگیاں بچانے اور محفوظ بنانے میں کلیدی کردار ادا کیا ہے۔اس موقع پر شرکاء نے بتایا کہ ۔سیکرٹری صحت محمد اسلم غوری نے کہا کہ طبی سائنس پر اعتماد کرنا اور اس کی پیروی کرنا کوئی آپشن نہیں بلکہ ناگزیر ہے۔ ہمارا اور ہماری آنے والی نسلوں کا مستقبل اسی سے وابستہ ہے۔ 78 برس قبل 7 اپریل کو پاکستان ان 61 ممالک میں شامل تھا جنہوں نے World Health Organization کے آئین کی توثیق کرتے ہوئے ایک صحت مند اور محفوظ دنیا کے مشترکہ مقصد کو اپنایا۔ آج 190 سے زائد ممالک اس تنظیم کے رکن ہیں اور پاکستان کا عزم آج بھی اسی طرح مضبوط ہے۔انہوں نے مزید کہا کہ گزشتہ دہائیوں میں سائنس اور عالمی تعاون کی بدولت ایسے امراض کا علاج ممکن ہوا جو ماضی میں لاعلاج تھے، جن میں ملیریا، تپ دق اور ہیپاٹائٹس سی شامل ہیں، جبکہ کینسر جیسے مرض کا علاج اور بعض اقسام کی روک تھام بھی ممکن ہو چکی ہے۔سیکرٹری صحت نے “ون ہیلتھ اپروچ” کی اہمیت پر بھی زور دیتے ہوئے کہا کہ انسانوں، جانوروں اور ماحولیاتی نظام کی صحت ایک دوسرے سے جڑی ہوئی ہے۔اس موقع پر ڈبلیو ایچ او کے پاکستان میں نمائندہ Dr Luo Dapeng نے طبی سائنس کے مثبت اثرات پر روشنی ڈالتے ہوئے بتایا کہ گزشتہ 50 برسوں میں ویکسینز کے ذریعے دنیا بھر میں 150 ملین سے زائد جانیں بچائی گئی ہیں۔ پاکستان میں ہر سال 70 لاکھ بچوں اور 55 لاکھ تولیدی عمر کی خواتین کو حفاظتی ٹیکے لگائے جاتے ہیں۔انہوں نے کہا کہ پولیو ویکسین کی بدولت 2 کروڑ سے زائد افراد معذوری سے بچ سکے، جبکہ گزشتہ 30 برسوں میں پاکستان میں پولیو کے کیسز میں 99.8 فیصد کمی آئی ہے۔ اسی طرح تپ دق کے علاج سے گزشتہ 25 برسوں میں دنیا بھر میں 83 ملین جانیں بچائی گئیں، جبکہ پاکستان میں گزشتہ ایک دہائی کے دوران 50 لاکھ سے زائد افراد کو علاج فراہم کیا گیا۔انہوں نے مزید بتایا کہ ہر سال ڈبلیو ایچ او، وزارتِ صحت کے ساتھ مل کر شدید غذائی قلت کا شکار تقریباً 70 ہزار بچوں کو زندگی بچانے والا علاج فراہم کرتی ہے۔تقریب سے خطاب کرتے ہوئے ڈاکٹر لوو داپینگ نے طلبہ کو مخاطب کرتے ہوئے کہا کہ آپ مستقبل ہیں، اور ہمیں امید ہے کہ آپ سائنس کے ساتھ کھڑے رہیں گے اور ایک بہتر اور صحت مند دنیا کی تعمیر میں اپنا کردار ادا کریں گے۔ World Health Organization ہمیشہ آپ کے ساتھ کھڑی رہے گی۔”ڈبلیو ایچ او پاکستان کے کنٹری آفس میں منعقدہ تقریب میں سیکرٹری صحت، طلبہ اور شراکت داروں نے شرکت کی ۔واضح رہے کہ World Health Organization کا قیام 1948 میں عمل میں آیا تھا، اور یہ اقوام متحدہ کا ادارہ ہے جو عالمی سطح پر صحت کے فروغ، تحفظ اور کمزور طبقات کی خدمت کے لیے کام کرتا ہے۔ پاکستان میں اس کا کنٹری آفس 1960 سے فعال ہے۔