خواتین کسی بھی معاشرے کی ترقی میں کلیدی کردار ادا کرتی ہیں محترمہ فرح عظیم شاہ۔

علی پور (نمائندہ خصوصی)بلوچستان عوامی پارٹی وومن ونگ کی صوبائی صدر اور ایمان پاکستان تحریک کی چئیرمین ایم پی اے فرح عظیم شاہ نے کہا ہے کہ خواتین کو بااختیار بنانا ان کی جماعت کے منشور کا بنیادی حصہ ہے اور اس مقصد کے حصول کے لیے عملی اقدامات کیے جا رہے ہیں۔وہ مظفرگڑھ کی تحصیل علی پور میں ایک بڑے عوامی جلسے سے خطاب کر رہی تھیں، جس میں خواتین کی کثیر تعداد نے بھرپور شرکت کی جبکہ مختلف شعبہ ہائے زندگی سے تعلق رکھنے والے افراد بھی بڑی تعداد میں موجود تھے۔ جلسے کا ماحول جوش و خروش سے بھرپور تھا اور شرکاء نے پارٹی قیادت کے حق میں نعرے بھی لگائے۔اپنے خطاب میں فرح عظیم شاہ نے کہا کہ خواتین کسی بھی معاشرے کی ترقی میں کلیدی کردار ادا کرتی ہیں، اس لیے انہیں معاشی اور سماجی طور پر مضبوط بنانا وقت کی اہم ضرورت ہے۔ انہوں نے کہا کہ بلوچستان عوامی پارٹی خواتین کو نہ صرف خودمختار بنانے کے لیے کوشاں ہے بلکہ ان کی صلاحیتوں کو اجاگر کر کے انہیں عالمی سطح پر متعارف کرانے کے لیے بھی اقدامات کرے گی۔انہوں نے سید عاصم منیر کی قیادت کو سراہتے ہوئے کہا کہ ان کی قائدانہ صلاحیتوں کی بدولت آج دنیا بھر میں پاکستانی پاسپورٹ کو عزت اور وقار کی نگاہ سے دیکھا جا رہا ہے، جو کہ ملک کے لیے ایک مثبت پیش رفت ہے۔
جنوبی پنجاب کے حوالے سے گفتگو کرتے ہوئے انہوں نے کہا کہ اس خطے کو ماضی میں مسلسل نظر انداز کیا گیا، جس کے باعث یہاں کے عوام آج بھی بنیادی سہولیات سے محروم ہیں۔ انہوں نے کہا کہ چند مفاد پرست سیاستدانوں کی ناقص پالیسیوں کی وجہ سے جنوبی پنجاب ترقی کی دوڑ میں پیچھے رہ گیا ہے۔فرح عظیم شاہ نے اعلان کیا کہ بہت جلد علی پور میں دستکاری اور ہنر کو فروغ دینے کے لیے مختلف ادارے قائم کیے جائیں گے، جہاں خواتین کو ہنر سکھانے کے ساتھ ساتھ انہیں روزگار کے مواقع بھی فراہم کیے جائیں گے۔ انہوں نے کہا کہ ان اقدامات کا مقصد نہ صرف خواتین کو بااختیار بنانا ہے بلکہ علاقے میں پائے جانے والے احساسِ محرومی کا خاتمہ بھی ہے۔انہوں نے اس عزم کا اعادہ کیا کہ بلوچستان عوامی پارٹی جنوبی پنجاب کی ترقی اور خوشحالی کے لیے ہر ممکن اقدامات جاری رکھے گی اور عوامی مسائل کے حل کے لیے اپنی جدوجہد جاری رکھے گی۔اس موقع پر درجنوں خواتین اور دیگر افراد نے بلوچستان عوامی پارٹی میں شمولیت اختیار کرنے کا اعلان بھی کیا۔ نئی شامل ہونے والی خواتین اور کارکنوں نے فرح عظیم شاہ کی قیادت پر اعتماد کا اظہار کرتے ہوئے کہا کہ وہ پارٹی کے پلیٹ فارم سے علاقے کی ترقی، خواتین کے حقوق اور عوامی مسائل کے حل کے لیے بھرپور کردار ادا کریں گے۔فرح عظیم شاہ نے پارٹی میں شامل ہونے والوں کو خوش آمدید کہا اور انہیں یقین دلایا کہ پارٹی کارکنوں کو عزت اور اہمیت دی جائے گی اور انہیں تنظیمی سطح پر فعال کردار دیا جائے گا۔ انہوں نے کہا کہ پارٹی میں شامل ہونے والوں کی یہ تعداد اس بات کا ثبوت ہے کہ عوام بلوچستان عوامی پارٹی کی پالیسیوں اور منشور پر اعتماد کر رہے ہیں۔